Jimmy Wales
Aus Wikipedia
 |
Der Àrtikl is im Dialekt „Owaöstareichisch“ gschriem worn. | |
Da Jimmy Donal Wales, Schbiznãm Jimbo (geboan im August 1966 in Huntsville in Alabama/USA), is a amearikanischa Intanet-Gscheftsmã, dea foa oim déswéng berümt woan is, wai a s Wikipedia grünt håd und gros gmåcht håd und a haid nu måsgéblich an deara Gschicht betailigt is. Ea is a bai ãndane Wiki-Projekde dabai, unta ãndam a bai da unkomeazieln Wikimedia Foundation und bai da profit-oarientiatn Fiama Wikia Inc.
Inhaltsverzeichnis |
[dro werkln] Familie
In Jimbo Wales sâi Fåta håd a Graisslagscheft ghåbt und sai Muata, de Doris, håd gemainsãm mid saina Grosmuata, da Erma, a klõane Priwatschui bedrim, dé neta õa Klassnzima ghåbt håd. Doat is a da Jimbo int Schui gãnga. Dé meara Zaid han neta fia Kinda in saina Schuischdufn gwén, wiaso a oiwai dé easchde bis zua fiatn Klass bainãnda woa und schbéda dãn de fünfde bis zua åchtn a. Priwat duad da Jimbo Wales haid gean sögin und ged gean aussi int Natua. Mid saina Frau Christine håd a a Dochda, de Kira.
[dro werkln] Sâi Schuizaid
Nåch da åchtn Klass is a in de Randolph School gãnga, a Schui in Huntsville in Alabama, de õan fiat Uni foaberait. Ea søwa håd amåi dazöd, das de Schui fia sai Familie recht a daire Gschicht woa, åwa Büdung woa eana wichdig. „Büdung is oiwai gãns wichtig gwén bai uns dahõam ... és wissz schã, so da tradizionele Wég, das ma si Wissn ãnaignet und fü leant und si damid a guade Basis fia s schbédare Lém schåft.“ Ea håd an Bachelor in Finanz fu da Auburn Uniweasitet und håd danåch a nu s Doktoarat ãn da Uniweasitet fu Alabama ãgfãng, wås a a mid am Master-Diplom ågschlossn håd. Danåch håd a nu Finanz-Kuase an da Uniweasitet Indiana gmåcht. Ea håd an dé zwoa Unis a schã untaricht, dawai a doat sai Postgraduate-Schdudium gmåcht håd. Sain Dokda håd a åwa dãn do nima featig gmåcht.
[dro werkln] Sâi berufliche Kariea
[dro werkln] Chicago Option Associates und Bomis
Fu 1994 bis ins Joa 2000 håd a ois Foaschungs-Schef bai Chicago Option Associates goawat, a Fiama, de mid Futures und Opzionen hãndlt. Nåch da Aussåg fum Daniel Pink fum Wired-Magazin håd a in dåmåis mid Schbekulazionen auf Zinsn und Dewisn gnuag Gød fadeant, das ea und sai Frau in Rest fu eanam Lém nix mea oawatn miassn hedn. In deara Zaid woara a bai da Gründung fu da Earotik-Suachmaschin Bomis dabai, de schbéda fü zua Finanziarung fum Wikipedia baidrång håd. Wås dés Bomis genau woa, is a Såch, iwa dé haid oft fü dischgriad wiad. Da Jimbo Wales søwa sågt, das dés õafåch a Suachmaschin fia Mãna woa, dé a earotische Såchan, enlich wia s Maxim-Magazin, mid Fotos fu knåp ãzogane Diandl, ãbodn håd. Ea sågt a, das dés kõa Soft-Porno woa, sondan håid Untahåitung fia Eawågsene.
[dro werkln] Wikipedia und d Wikimedia Foundation
1999 håd a zum eastn Måi dé Ide ghåbt, da ma a Online-Enziklopedi måcha kintad. Schbeda håd a am Schuanalistn amåi gsågt, das dåmåis schã a Brobeweasion fia a Enziklopedi-Software entwükit ghåbt håd, dé åwa nu waid z lãngsãm woa.
Im Meaz 2000 hod a dãn dé Open-Content-, oiso mid fraien Inhåit ausgschdåite, Online-Enziklopedi Nupedia grünt, dé am Ãnfãng an Peer-Review, oiso a Begutåchtung duach unåbhengige åndare Laid dabai gåbt håd. Dafia håd a in Larry Sanger ois sâin Schef-Redaktea ãngaschiad.
Im Jena 2001 håd da Larry Sanger öfentlich in Foaschlåg gmåcht, das ma a Enziklopedi måcha kintad, dé auf da Wiki-Software basiad. Auf dés aufi håd da Jimbo Wales dãn de Wiki-Software auf an Server inschdaliad und in Larry Sanger ãgschåft, ea soid si um dés gãnze küman, åwa schã unta saina aigenen Aufsicht. Da Larry Sanga is dãn aufn Nãm Wikipedia kema und da Jimbo Wales håd si dawai dé Wikipedia-Grundsez ausdåcht und dafia gsoagt, das Inhåit aini kumt und a Intanet-basiate Community fu Laid, dé då midmåchan, entschded.
Am Ãfãng woa dés so dåcht, das dés Wikipedia neta so a Expearimentia-Gschicht is, dé dés Nupedia-Projekt dãn waida bringa soid. Nåchdém åwa glai fu Ãfãng ã s Wikipedia foi schø gwågsn is, is dé Nupedia-Gschicht oiwai mea in Hintagrund grådn. In deara Zaid håd is a in Larry Sanger sâi Bostn fu Bomis finanziad woan, wobai a sowoi fia s Nupedia-Projekt ois a fia dé Wikipedia-Gschicht goawat håd. Im Februa 2002 håd dãn Bomis gsågt, dass in Sanger sain Bostn nima lenga finanzian kinan und auf dés aufi is da Larry Sanger aus ole zwoa Projekte ausgschding und da Jimbo Wales håd alõa waida gmåcht.
Da Jimbo Wales håd schbéda amåi gsågt, das a dåmåis so gfiacht håd, das Wandaln dé gãnze Wikipedia-Saitn ruinian, das a Mitn in da Nåcht aufgschdãndn is, nåchschaun, ob e ois bast.
Im Soma 2003 håd da Jimbo Wales dãn de Wikipedia Foundation grünt, a unkomeaziele Schdiftung mid Siz in Saint Petersburg in Florida, damid dés Wikipedia-Projekt und saine nu naichan Åblega gföadat wean. 2004 håd a in am Intawiu gsågt, wås sâi Wision bai dém Projekt woa: „Schdöz aich foa, jéda Ménsch auf da gãnzn Wöd hed Zuagãng zum gãnzn Wissn fu da gãnzn Ménschhaid iwahaupst – dés is dés, wås mia dõa woin.“
[dro werkln] Wikia
Im Joa 2004 håd da Jimbo Wales gemainsãm mid da Angela Beesley, zusezlich a nu dé gewinnoarientiate Fiama Wikia Inc. grünt. Wikia is a Wiki Farm, dés hoast a Sãmlung fu fü faschidane Wikis zu gãns faschidane Démen, dé ole auf õana Website ghosted wean. Õana fu dé Services, dé eam dåmåis foagschwébt san, woa Wiki Search, a Suachmaschin, mid deara Google iwadrumpfn woit, wai Google saina Mainung nåch fü z fü „Spam und unbrauchboan Schais“ broduziad.
Ea woit, das dé Grundschdruktua und Suachmechanismen fu dém Wiki Search transparent sai soitadn. Ea håd sogoa gsågt: „Dés is wås gãns Elementares. Grundsezliche Infoamazion iwa d Wød soid neutral sai, und es soid an transparentn und a nåchfoiziagboare Diskusion gém, wia dés Gãnze z Schdãnd kumt.“ Ausadém håd a gmõand: „I fadrau Google schã, åwa dés is wia mid am Politika, dém ma fadraut. I mechad drozdem, das dé Diskusionen im Schdåtråd öfentlich san. I wü drozdém a Transparenz håm, wia d Regiarung weakt, sogoa wãn i da Peason fadrau, dé gråd im Ãmt is.“
[dro werkln] Aufdrid in de Médien und Earungen
Da Jimbo Wales is 2005 zum Mitglid fum Berkman Center for Internet & Society auf da Rechtsfakultät fu da Harvard-Uniweasitet eanãnt woan. Am dritn Oktoba 2005 is a nåch ana Pressemittailung a nu Mitglid fum Aufsichtsråd fu Socialtext woan, am Ãnbita fu Wiki-Technologi fia d Wiatschåft. 2006 is a a nu Aufsichtsråd-Mitglid fu da unkomeazieln Oaganisazion Creative Commons woan, dé si fia fraie Inhåite in dé Medien und da Kunst âisézn und géng s schoafe Copyright kempfn.
Am åchtn Mai 2006 is a fum Time-Magazin in da Rubrik „Foascha und Denka“ ois õane fu de 100 wichtigstn Peasonen aufglist woan.
Am dritn Juni 2006 håd a an Eandokda fum Knox College griagt. Fu da Electronic-Frontier-Schdifdung håd an an Pionia-Prais griagt am dritn Mai 2006.
Da Jimbo Wales woa a bai da Charlie Rose aufn Feanse-Senda PBS am ségstn Oktoba 2006 und is a zum „Boatdréga fum Joa 2006“ nominiad woan.
Am fiatn Nofemba 2006 is da Jimbo Wales a bai da Sendung „Wait Wait ... Don’t Tell Me!“ eawénd woan, ana Gaudi-Quiz-Show auf National Public Radio. S Déma woa „Es muas schdima, I håbs auf Wikipedia glésn“. Dé drai Frång, dé gschdöd woan san, woan fu dubiose Infoamazionen, dés auf Wikipedia gfundn hãm und san fu dé Kandidatn ole fåisch beãntwoat woan.
S Forbes-Magazin håd eam ois Numa zwöf in eanara easdn Listn fu de 25 wichtigstn Intanet-Prominentn aufglist.
Iwan Jimbo Wales woa am zwoatn Abrü 2007 a a Artikl im Time-Magazin, wo a zehn Frång beãntwoat håd, dé fu Lésa an de Redakzion gschikt woan san. Ea is ois zwoata auf dé Oat fum Time-Magazin intawiud woan, nåchn Chris Rock. In dém Intawiu håd a de Schwechn fum Wikipedia aigschdåndn, wobai a oiwai betont håd, wia wichtig und sinfoi dés Projekt grundsezlich is.
[dro werkln] Kontrowease Gschichtn iwan Jimmy Wales
[dro werkln] Bomis
Wia om schã eawénd, håd da Jimmy Wales am Ãfãng fu saina Intanet-Kariea bai da Fiama Bomis goawat, dé a in Start fu Wikipedia midfinanziad håd, und dé Fiama håd unta ãndam a earotische Fotos im Néz fadrim, wås natiali in de USA dãn a hefdige Diskusion ausglésd håd. Ea söwa håd dabai oiwai betont, das dés nix oags woa und kõane Hardcore-Såchan oda so.
[dro werkln] Sâi aigene Biografi auf Wikipedia
A zwoate schoaf diskutiade Gschicht rund uman Jimbo Wales is, das a ãnschainend am Wikipedia-Artikl iwa eam søwa umadum gweakt håd. A Såch, dé nåch dé Wikipedia-Richtlinien aigentlich gãns schwoaf fauatailt wiad. Dabai is foa oim um de Peason Larry Sanger und sai Roin bai da Gründung fum Wikipedia gãnga, åwa a um de Bomis-Gschicht. Da Larry Sanger håd eam foagwoafn: „Nåchdém I dé Endarungen gseng håb, glaub I, das da Jimbo Wales de Gschicht [Anm. fum Wikipedia] naich schraim woitad, åwa in da schén naichn Wød [englisch Brave New World) vo da Transparenz kumt de Woahaid schnø aussa.“
In am Artikl im New Yorker fum dritn Juli 2006 is a gschrim woan: „Sogoa da Wales søwa is dawischt woan, das a in Wikipedia-Artikl iwa eam søwa gendat håd – åchzen Mai im lézdn Joa. Ea is bsondas sensibl iwa Hinwais zum Porno-Gscheft fu saim Web-Portal. Ea søwa nend s „Eawåchsenen-Inhåite“ und „Glamourfotos“, åwa dés san, so wia s a User beschrim håd, woaschainli néd de optimaln Begrif, mid denan ma Lesben-Strip-Poker-Draia beschraim kintad. (Im Jena håd da Jimbo Wales zuagschdimt, das ois Kompromis „Erotikfotos“ doat schded.)“
Bai oi zwoa Ãngelegnhaidn håd da Jimbo Wales gsågt, das a neta de Genauigkait fum Wikipedia fabéssan woit. Ea håd si dãn åwa dafia entschuidigt, das a an saina aigenen Biografi umadum gschrim håd, wai dés jå noamalawais néd tolariad wiad in Wikipedia. In am Intawiu mim Wired-Magazin håd a gsågt: „De Laid soitadn néd an de Artikl iwa eana søwa weakln, und dés güt a fia mi. Am liabst warad s ma, wãn I dés nia dã hed.“
[dro werkln] Sâi Schdraid mim Larry Sanger
Da Jimbo Wales behaupt åwa oiwai nu, das ea da õanzige Gründa fu Wikipedia is, wai da Larry Sanger neta sâi Ãngschdöda woa. 2006 håd a im Boston Globe dazöd, dass absuad is, in Larry Sanger ois Mid-Gründa fum Wikipedia zum bezaichna, obwoi a schã im Septemba 2001 ois soicha bezaichnet woan is und da Sanger si a søwa ois Mid-Begründa im Joa 2002 bezaichnet håd. Zusezlich zum Sanger saina Oawat am Ãfãng fu Wikipedia is s a sai Ide gwén, de Wiki-Software fia an Online-Enziklopedi-Projekt zum fawendn. Ea håd a in Nãm fu dém gãnzn eafundn. Ea gibt åwa a zua, das: „Damid ma uns då kloa san, de Ide fia so a Open-Source- und partizipatife Enziklopedi, bai dea gãns noamale Laid midmåcha kinan, is komplet fum Jimbo gwén, néd fu mia. Und de Finanziarung woa oisa gãnze fu Bomis. De Entwiklung fu da Enziklopedi håd a åwa gãns alõa mia iwalåssn.“
Ois Ãnwoat zum Wales sain Rewisionismus håd da Larry Sanger auf saina aigenen Homepage sai Kloaschdölung zu dém Gãnzn publiziad, wo a a åide Pressemittailungen fu Wikipedia und Zaidungsartikl ois Bewais ãfiad, dé ole in Jimbo Wales und eam søwa ois Gründa bezaichnen. Bai ana Diskusion mid n Brian Bergstein fu da Associated Press håd da Jimbo Wales dazua gsågt: „Wånz iwa dés schraibz, kopiaz ned unhintafrågt, wås da Sanger dé gãnze Zaid behaupt. Es is absuad, das ea da Mid-Begründa fu Wikipedia sai soid. I rég mi e ned Voigas auf zwéng dém. De Faktn san auf maina Saitn und déswéng is ma dés e mea oda weniga wuascht.“
[dro werkln] Gebuatsdatum
Es is ned sicha, an wøchn Dåg da Jimbo Wales genau geboan woan is, wai a søwa untaschiadliche Ãngåm dazua gmåcht håd – õa Måi håd a sibta August gsågt, õa Måi åchda. Und obwoi mearare Schuanalistn dém nåchgãnga san, iss bis haid néd gãns kloa. Sicha is åwa da August 1966.
[dro werkln] Sâi peasönliche Filosofi
Da Jimbo Wales is a békenenda Ãnhenga fu da Filosofi fum Objektiwismus. Ea håd sogoa sâi Dochda nåch ana Figua fu da Ayn Rand iam Roman We the Living benãnt, nemli Kira. Ea sågt åwa iwa si søwa, das ea si im Gégnsåz zu de maisdn bekenendn Objektiwistn zãmraist und néd an jédn sâi peasönliche Mainung aini drukt.
In am Intawiu mid n Brian Lamb fu C-SPAN’s Q&A (Anm. Frågn und Ãntwoatn) håd a zum Déma Ayn Rand gsågt, das fia eam de Tugend vo da Unabhengigkaid gãns wichtig is. Auf de Fråg, ob a de Gschicht fu da Ayn Rand a fia politisch wichtig håit in da momentanen Situation, håd a gsågt, das a si søwa ois Libaraln bezaichnen dad, und das a dé Prinzipien fu Fraihaid, indiwiduele Grundrecht und am gewåitfrain Umgãng mid de Midménschn fia gãns wichtig håit. De Libarale Party in de USA (Libertarian Party) håit a åwa fia Schbina, håd a gsågt.
Fu 1992 bis 1996 woa da Jimbo Wales a da Bedraiba fu da Mailing-List „Modariate Diskusion iwa de Filosofi fum Objektiwismus“. A Foto fum Jimbo Wales woa a auf da Coversaitn fu da Juni-2007-Ausgåb fum bekãnt libaraln Magazin Reason.
[dro werkln] Publikazionen fum Jimmy Wales (auf Englisch)
- Robert Brooks, Jon Corson, and J. Donal Wales. "The Pricing of Index Options When the Underlying Assets All Follow a Lognormal Diffusion", in Advances in Futures and Options Research, volume 7, 1994.
 |
Der Artikl gheart zu de berign Artikl in da boarischn Wikipedia. |
