Woiperdinger

Aus Wikipedia

Wolpertinger (frei nåch Albrecht Dürer)

Da Woiperdinger (a Wolperdinger, Oibadrischl, etc. gnannt) is woi des berühmteste Viech vo Bayern, obwoi es no koaner gsehgn hod. Auf jädn Foi gibts koanalei handfeste Beweise dafia, obwoi vei Leit des behauptn. Es gibt a koane Photos oder dergleichen.

[dro werkln] Ausschaugn

As Aussehn da Woiperdinger zum beschreibn is ned gånz oafach, daweil es ganz verschiedene gibt. Im allgemeinen håd er zwoa oder vier Haxn, Herner und oft a Fliagl. Ansonsten schaugt er fåst aus wia a Hås. Es gibt åber a welche, de wo Fiischflossn håbn oder Entnfiaß. Schwimma kennans åber trotzdem neda.

[dro werkln] Lebensramm

Da natürliche Lebensramm vo eam is da Woid, vereinzelt kimmt er åber a auf Fejder und Wiesn vor. Åber er scheicht de Menschn, und deßweng gibt's eam heitzudåg gråd no im Boarischen Woid, de Åipen und in menschenlaare Geganden. Durch de ausbreitende Besiedelung vo de Menschn und de vein Turistn is sei Bestand mittlerweile stark reduziert. Am ehersten is er beim Finsterwern und bei Nacht zum treffa, weil er a nachtaktives Viech is.

[dro werkln] Fuada

'S wead gsågt, dåss a habtsächlich vo Wurzln, Beern und andare Pflanzen lebt, åba a Insekten, kloane Viecha oda (in de Åipen) Gamsnoar frisst. Des Gerücht, dåss a Menschenbluat dringa daad, is ned wor und er is fia'n Menschen überhaupts koa G'fahr, sondern er scheicht de eher.

Im allgemeinen is zum sågn, dåss ma ned vui woaß über an Woiperdinger. So ziemlich ois is ned ganz sicher und mancher behauptet sogar, dass's überhaupts koan Woipertinger gibt.

[dro werkln] Biacher

Alfons Schweiggert (Verf.), Kaut, Angelika (Fotos): Und es gibt sie doch! Die Wahrheit über die Wolpertinger, Pfaffenhofen/Ilm: Ludwig, 1988, broschiert, 56 Seiten, ISBN 3778733257
Alfons Schweiggert: Der Wolpertinger oder der gehörnte Hase. Eine ernsthafte Untersuchung eines bayerischen Phänomens, München 1994.
Paul Schallweg: Der Wolpertinger. ISBN 3475527952
Reginald Huber: Vom Adler bis zum Wolpertinger - Das bairische Bestiarium. Bayerland VA, ISBN 3892511888
Michael Heim: Der Wolpertinger lebt. Lipp, ISBN B0000BRIVD
Peter Kirein: Der Wolpertinger lebt. Lipp, ISBN 3874905012
Walter Moers: Rumo^[1]. Piper Verlag; A Roman üba an Woiperdinger. Zwar auf Hochdeitsch, aba unglauble spannend!