Apostolu
Wikipedia(e)tik
Apostoluak Nazareteko Jesusek Elizaren gidaritzan jarritako hamabi jarraitzaileak dira, kristautasunaren arabera. Izena bera grezieratik dator (ἀπόστολος (apostolos), euskaraz bidalia esan nahi du).
Jesusek 12 hauek aukeratu zituen apostolu izateko:
- Petri
- Ander (aurrekoaren anaia)
- Jakue (Zebedeoren semea)
- Joan (aurrekoaren anaia)
- Filipe
- Bartolome
- Mateo
- Tomas
- Jakue Alfeorena
- Simon Zelote
- Juda Tadeo
- Juda Iskariote.
12 gizon aukeratuta, Israel zaharreko 12 leinuak ordezkatu nahi izan zituela uste da. 12 zenbaki sinbolikoa da Biblian, beste askorekin batera (hiru, zazpi, berrogei...).
Juda Iskariote ez beste guztiak Galileakoak ziren, Jesus bezala. Apostolu hauek Jesusen ageriko bizitzan parte hartu zuten, eta beraiekin izan zen Azken Afarian. Iskariotek Jesus saldu zuen Ostegun Santuan, eta heriotzara zigortua izan zela jakitean, damuturik, bere buruaz beste egin zuen. Jesusen piztueraren ondoren apostoluek Matias aukeratu zuten saltzailearen ordezko.
Bibliaren ikuspegi fundamentalistak hiru baldintza jartzen ditu apostolu izateko:
- Jesusek berak aukeratua izatea.
- Jesus pertsonalki ezagutzea.
- Jesusen piztueraren lekuko izatea.
Definizio honek baditu bere zailtasunak. Izan ere, Juda Iskariotek ez zuen Jesus berpiztua ezagutu, nahiz eta Itun Berrian apostolu izena ematen zaion. Bestalde, Matiasek eta Paulok (azken hau jentilen apostolua izendatzen da Elizan) ez dakigu Jesusen ageriko bizitza jarraitu zuten edo ez. Itun Berrian beste zenbait kristau ere izendatzen dira apostolu: Bernabe, Timoteo, Silas, Tito, Androniko, Junias... Elizak apostolu izena eman die santu batzuei, besteak beste, Xabierko Frantziskori Indietako Apostolu izena ezarri zion.
