Globalizazioa

Wikipedia(e)tik

Globalizazioa edo mundializazioa, gaur egun dagoen komunikatzeko eta garraiatzeko erraztasuna dela eta, merkatuen arteko batasuna eta kultura eta gizarteen arteko hurbilketa bultzatzen duen prozesua da.

Globalizazioa gerta zedin, hainbat aldaketa sozial, ekonomiko eta politiko jazo behar izan dira. Hainbat parametro planeta osorako neurtzen dira Lurra unitate bat izango balitz bezala, produkzio moduak eta kapital mugimenduak mundu mailan ematen dira, bitartean estatuetako gobernuak euren eragina galtzen ari dira eta gizarte zibiletik hainbat mugimendu sortu dira globalizazio prozesuaren kalteen kontra. Gaur egun bizi dugun globalizazioa, kapitalismo basatiaren zabalkuntza dela salatzen du Globalizazioaren aurkako mugimenduak (altermundialista eleaz ezaguna Ipar Euskal Herrian). Ekonomia gizakiaren gainean jartzen duela diote, eta globalizazioaren ondorioz ez direla konpontzen aberatsen eta pobreen arteko aldeak.

Ikuspuntu ekonomiko batetik, merkataritzaren liberalizazioa aipatzen da globalizazioari buruz hitz egiten denean. 1910 eta 1950 urteen artean, hainbat gertakari historikok nazioarteko merkataritzari garrantzia jaitsiarazi zioten. Bigarren Mundu Gerraren ondoren, nazioarteko erakunde ekonomikoak sortu ziren Gerrak txikitutako hainbat herri berreraikitzeko eta nazioarteko merkataritzak gora egin zuen. 1970. urtetik aurrera, mundu mailan gertatzen ari ziren hartu-emanen ondorioak ikusgai zeuden: bai onuren aldetik baita kalteen aldetik ere.

[aldatu] Globalizazioaren esanahiak

Hiri Globalaren osaera: Munduko zati ezberdinen arteko kontaktu estuagoa, hartu-eman aukera gehiago pertsonen artean, elkar ulermena eta adiskidetasun gehiago munduko herritarren artean. Zibilizazio baten sorrera ekar dezake globalizazioak.

Globalizazio ekonomikoa: 'Merkataritza librea' industria bateko kideen arteko harreman estutze bat, nahiz eta kide horiek mundu osoan sakabanaturik egon, honek nazio burujabetasunaren jaitsiera dakar eremu ekonomikoan. Munduko Moneta-Funtsaren iritziz globalizazioa "herrien arteko interdependentzia ekonomikoa" da "non mugaz gaindi merkantziak eta zerbitzuak gero eta gehiago trukatzen diren, kapitala era aske batean jariotzen den eta teknologia gero eta azkarrago zabaltzen den."

Mozkina ateratzeko diren Korporazio multinazionalen ondorio negatiboak - lege eta finantza trikimailu konplexuen erabilpenari esker, ez dute zertan maila lokaleko legeak bete behar; hori horrela, herri pobreen langilego eta baldintzak bata bestearen kontra erabiltzen dituzte mozkin haundiena lortzeko asmotan.