Radio Maryja
Ón Vicipéid, an chiclipéid shaor.
Stáisiún raidió sa Pholainn is ea é Radio Maryja a bhfuil blas an choimeádachais Chaitlicigh agus an náisiúnachais Pholannaigh ar a chuid cláracha. Stáisiún príobháideach é agus é bunaithe ag Ord an tSlánaitheora Rónaofa (na Slánaitheoirigh) sa bhliain 1991. Tá an stáisiún suite i dToruń i dTuaisceart na Polainne. Is é an tAthair Tadeusz Rydzyk ceannasaí an stáisiúin. I Mí na Bealtaine sa bhliain 2006, cheap comhairle na n-easpag Polannach coiste ar leith le súil a choinneáil ar chláracha Radio Maryja, agus an t-athair Wacław Depo, ollamh agus príomhoide scoil traenála na sagart i Radom i gceannas ar an gcoiste.
Cláracha creidimh is ea iad formhór mór na gcláracha. Thairis sin, athchraoltar nuacht na Vatacáine. Is í an tráchtaireacht ar na cúrsaí reatha is mó a tharraingíonn conspóid, sa Pholainn agus i gcéin.
Tá an stáisiún go tréan in aghaidh an Aontais Eorpaigh, agus é ag lochtú saoirse an ghinmhillte agus an homaighnéasachais in Iarthar na hEorpa. Thairis sin, is iad an domhandas agus an eacnamaíocht liobrálach na naimhde is mó atá ag an stáisiún. Tríd is tríd, is ionann dearcadh sóisialta agus polaitiúil an stáisiúin raidió agus an cineál dearcadh a bhí ag an bPáirtí Daonlathach Náisiúnta sa Pholainn roimh an Dara Cogadh Domhanda, an páirtí a raibh Roman Dmowski i gceannas air. Is é sin, cé go bhfuil an stáisiún go mór mór i gcoinne aon chineál liobrálachais i gcúrsaí an ghnáthshaoil, an chreidimh agus na nósanna, bíonn sé ag lochtú féinspéis agus míthrócaire na rachmasóirí is an chaipitlíochais agus ag caitheamh amhrais sna leasuithe polaitiúla a rinneadh sa tír i ndiaidh thitim an Chumannachais, an príobháidiú ach go háirithe.
Is é an locht is mó a fuarthas ar Radio Maryja go bhfuil blas an fhrith-Ghiúdachais le haithint ar chuid mhór den tráchtaireacht ar chúrsaí reatha. I mbreis air sin, thacaigh an stáisiún go hoscailte leis an bpáirtí Prawo i Sprawiedliwość le linn olltoghchán na bliana 2005. Thuill a leithéid cáineadh don raidió ó thráchtairí Caitliceacha féin, ó bhí siad den tuairim nach raibh sé inghlactha go ndéanfadh raidió Caitliceach bolscaireacht ná toghchánaíocht ar mhaith le haon pháirtí ar leith.
Maidir le Lech agus Jarosław Kaczyński, Uachtarán agus Príomh-Aire na Polainne, agus iad ag seasamh don pháirtí Prawo i Sprawiedliwość, chosain siad i Mí Aibreán sa bhliain 2006 an stáisiún go tréan ar an gcáineadh, agus iad den bharúil go bhfuil cead cainte ag cách, ag Radio Maryja fiú, i dtír shaor.
