Georges Simenon
De Wikipedio
Georges Simenon naskis en la belga urbo Liège (Lüttich, Luik) ye 13 di februaro 1903. 
Il pasas sua yuneso en Liège. Evanta 15 yari Georges livas skolo por laborar ye la 'Gazette de Liège'. Il artiklifis pri temi diversa e il skribas diala jurnalo-kolumno. Samtempe il probas romanifar; en 1921 aparas, ye la pseudonimo G. Sim, lua unesma libreto Au Pont des Arches. Decembro 1922 il, kun sua spozino Régine Renchon, livas Liège ed iras a Paris ube il publikigas inter 1923 e 1933 ye diversa pseudonimi preske 1000 rakonti e proxime 200 romaneti. Kom seglero fanatika il pasas multa tempo surmare e sur riveri e kanali Europala. En 1929 il kreas dum restado en la urbeto Delfzijl (Nederlando) la personajo Maigret, policestro en Paris. La parisana policisto es tre populara ed entote 72 romani pri Maigret aparas, la lasta en 1972.
Balde Simenon es kapabla alternar la suceso di Maigret kun romani psikologiala; il verkifas entote 117 de ica romani. Ilua verko tradukesas en plu kam 60 lingui (mem tradukuri internaciona-lingua aparis: Maigret hezitas (1999) ed Maigret kaj la maljuna damo (2002); ambe edituri esperanto-lingua) e multa romani filmagesas. On evaluas ke entote duima miliardo (500.000.000) libri imprimesis. Dum ke il romanifas, Simenon es survoya permanante. Pos Paris il iras a Charente; dum la duesma mondo-milito il restas en la Vendée-regiono.
Pos la mondmilito en 1945 il livas Francia e voyajas tra Amerika ube il renkontras Denyse Ouimet. Il engajas el kom sekretario, pose el anke divenas ilua amoranto e tandem ilua duesma spozino. Il ja livas Usa en 1955 e retrovenas a Francia ube il sejornas en Paris e ye la franca sud-litoro ante ke il definitive foriras a Suisia. Balde Denyse livas il e lia servisto Teresa Sburelin remplasas el kom vivo-kompano di Simenon. Autune 1972 Simenon anuncas oficale ke il retretas, il ne plu publikigas romani ma il ankore ya diktas sua memoraji qui publik-igesas en 22 tomi.
En 1981 ankore aparas ilua Mémoires Intimes qua deskriptas ilua vivo-stilo kom-plexa. Georges Simenon mortas, evanta 86 yari, ye 4 di septembro 1989 en ilua domo en Lausanne.
