Félagið Ísland-Palestína
Úr Wikipediu, frjálsa alfræðiritinu
Félagið Ísland-Palestína er stofnað 29. nóvember 1987 til þess að styrkja vináttu og tengsl Íslendinga og íbúa Palestínu, og stuðla að friði í Palestínu, vinna gegn aðskilnaðarstefnu og styðja baráttu Palestínumanna fyrir réttindum sínum.
Félagið hefur í gegn um tíðina staðið fyrir heimsóknum erlendra gesta til Íslands, þar á meðal eru Omar Sabri Kittmitto, þá sendiherra Frelsissamtaka Palestínu í Osló, ísraelska baráttukonan Arna Meir, palestínski læknirinn og forsetaframbjóðandinn dr. Mustafa Barghouti og Ziad Amro, stofnandi Öryrkjabandalags Palestínu. Einnig hefur félagið haft milligöngu um að Íslendingar fari til Palestínu, bæði sjálfboðaliðar sem hafa veitt Palestínumönnum aðstoð, og aðrir, sem hafa farið til að sjá ástandið þar. Félagið hefur haldið nokkra fundi á ári, auk tónleika og matar- og menningarkvölda.
Félagar í Félaginu Íslandi-Palestínu eru um 450 talsins. Málgagn þess heitir Frjáls Palestína og hefur yfirleitt komið út árlega. Félagið hóf neyðarsöfnun handa Palestínumönnum síðla árs árið 2000, og höfðu alls safnast um fimm milljónir króna snemma árs 2005. Þeim fjármunum hefur verið varið í að styðja læknasamtök, öryrkjasamtök, kvennasamtök og fleiri grasrótarhreyfingar. Félagið hefur hvatt til þess að ísraelskar vörur séu sniðgengnar.
