Gestur Pálsson
Úr Wikipediu, frjálsa alfræðiritinu
Gestur Pálsson (1852-1891) fæddist á Miðhúsum á Reykjanesi í Barðastrandarsýslu. Hann varð stúdent úr Lærða skólanum 1875 og hóf síðan að nema guðfræði við Hafnarháskóla en hvarf frá námi án þess að ljúka prófi. Eftir námsdvölina í Kaupmannahöfn dvaldi hann nokkur ár í Reykjavík og fékkst þá meðal annars við kennslu og skrifstofustörf. Þá ritstýrði hann einnig blaðinu Suðra. Gestur fluttist til Winnipeg árið 1890 þar sem hann tók við ritstjórn Heimskringlu, blaðs Íslendinga í Vesturheimi. Ekki varð ritstjóraferill hans þó langur því hann dó í Winnipeg árið eftir. – Gestur var einn Verðandimanna sem svo voru kallaðir vegna þess að þeir gáfu út tímaritið Verðandi 1882 þar sem þeir birtu eftir sig verk í anda raunsæisstefnunnar en hún var þá sem óðast að ryðja sér til rúms á Norðurlöndunum. – Gestur var einlægur fylgjandi raunsæisstefnunnar og skrifaði sögur í anda hennar.
[breyta] Heimildir
- Sýnisbók íslenskra bókmennta frá 1550 til 1900, Kristján Eiríksson tók saman, Reykjavík 2003.
