John Keigwin
Dhyworth Wikipedia, an godhoniador rydh
John Keigwin (1641-1716) o antikwari ha Kerneweger, genys yn Porth Ynys, Kernow. Eve o "ugheldas" an antikwaris yn Howlsedhes Pennwydh, y'ga mysk John ha Thomas Boson, William Gwavas, Thomas Tonkin, William Borlase, Oliver Pender, ha James Jenkins a Alverton. War-lergh Lhuyd ha Borlase, skentoleth Keigwin a-dro dhe'n tavas Kernewek o "down ha kowal" (profound and complete). Yth aswonni ev Frynkek, Latin, Grew, hag Ebrow ynwedh.
Keigwin a wrug an treylyansow Sowsnek a Basshyon agan Arloedh ha Gwrians an Bys a via dyllys gans Davies Gilbert yn 1826 ha 1827. Dew gernewekheans an Pader ev a wrug (onan yn Kernewek Kres hag onan yn Kernewek Diwedhes), warbarth gans kernewekheansow an Deg Gorhemmynadow, an kynsa chaptra a Lyver Jenesis, ha lyther Charlys I dhe'n Gernowyon. War-lergh Henry Jenner, yth esa niver a "gammwriansow koynt" (extraordinary mistakes) yn treylyans Keigwin a'n gwariow Passhyon ha Gwrians; hag y frederi Jenner bos Keigwin goethus a-dro dh'y aswonnvos.
John Boson a skrifas y skrifenn-bedh: kan a beder linenn yn Kernewek.