Atomteken
Vun Wikipedia
Dat Atomteken is de kotte Schrievwies för de Naamen von de cheemsch Elementen, as de in Formeln un Tabellen (t. B. dat Periodensystem) bruukt warrt. Disse Teken sünd von de IUPAC fastleggt worrn, gült internatschoonal un warrt ok in Länner bruukt, de an sik ganz annere Bookstaven verwennt.
De Tekens sünd afleidt von de latiensch oder greeksch Naamen, bi de niegen Elementen warrt ober ok von de engelsch Beteken utgahn. Normalerwies besteiht dat Atomteken ut een oder twee Bookstaven, wobi de eerste jümmers groot schreven is. Enige künstliche Elementen mit hooge Atomtall hebbt noch keen endgültigen Naam, man warrt mit vörlöpig latiensche Tallen nöömt. De hebbt afkött denn dree Bookstaven.
Bispele för Atomteken sünd:
- O = Suerstoff (von Oxygenium)
- C = Kohlenstoff (von Carboneum)
- Ne = Neon
- Fe = Iesen (von Ferrum)
- Au = Gold (von Aurum)
Dorbi mutt’n ober oppassen op groote oder lütte Bookstaven, wie t. B. mit dat C un dat O:
- Co steiht för dat Element Kobalt
- CO steiht ober för Kohlenstoff un Suerstoff, wat tohopen een Kohlenstoffmonoxid-Molekül darstellt.
