Huus Tudor
Vun Wikipedia
Dat Huus Tudor [[ˈtuːdə], [ˈtʲuːdə]], up walisisch Tudur oder Tewdwr (engl. Royal House of Tudor), is de Naam vun ene Familie ut Wales up den Throon vun den Königen vun England. Se regeern vun 1485 bit 1603.
De eerste engelsche König ut dat Huus Tudor weer Heinrich VII.. He meen, de Platz up den engelschen Throon weer sien vunwegen siene Mudder Margaret Beaufort. De stamm direktemang vun den König Eduard III. ut dat Huus Plantagenet af, de 1377 storven weer. Heinrich sien Vadder weer Edmund Tudor, Earl of Richmond. Edmund nu wedder weer de Söhn vun Owen Tudor, de dat Huus Tudor grünnt hett.
Heinrich VII. weer Anföhrer vun de Partei vun dat Huus Lancaster. De legen al siet lange Johren in Striet mit dat Huus York. Dor güng dat üm den engelschen Throon bi. In de Slacht vun Bosworth Field kreeg he 1485 den lesten König ut dat Huus York ünner. Dat weer Richard III.. Dar Parlament hett em denn as neen König gellen laten un he hett de Süster vun den doden König heiraat. Dat weer Elizabeth of York. Em sünd noch fiev Königen ut siene Familie up den Throon folgt: Heinrich VIII., Eduard VI., Lady Jane Grey, Marie I. un Elisabeth I..
