Sassen (Volk)

Vun Wikipedia

De Sassen weren en Stamm vun de Germanen in den Nordwesten vun dat hüdige Düütschland un de hüdigen ööstlichen Nedderlannen. Dor leven se vun dat 2. un 3. Johrhunnert af an, villicht ok al länger. De Sassen hebbt nix to doon mit dat Bundsland Sassen. De Inwahners vun dat Bundsland sünd ut fränksche Wuddeln wussen. To'n Ünnerscheed warrt to dat Volk vun de Sassen ok Ooltsassen seggt.

Kaiser Karl de Grote harr dat sassische Rebeet innahmen un de Sassen döpen laten. Dörtig Johr Krieg harr Karl bruukt, dat he de Sassen överwinnen kunn. Denn harr he in Veern an de Aller sien Blootgericht hollen un 4500 sassische Lüüd en Kopp körter maakt. Avers later kemen denn mit de Ottonen ok Sassen op den Kaiserthron.

[Ännern] Historie

100 De röömsche Schriever Tacitus vertellt vun de Ingvaeonen, wat de Vöröllern vun de Sassen, de Fresen un de Jüten weren. De Ingvaeonen seten an de Noordsee.
200-400 De Sassen breedt sik vun Holsteen na Süden ut un sitt nu ok in Westfalen un Ostfalen.
300-500 Sassen, Angeln un Jüten seilt na Grootbritannien. Dor sünd dat denn de Angelsassen. Ut dat süüdlich Britannien warrt England
üm 530 De Sassen kümmt bit an den Rhien.
af 596 De Angelsassen warrn Christen
718 De franksche Huusmeier Karl Martell treckt tegen de Sassen, vun wegen dat de Sassen de Neustriers hülpen harrn.
743 De franksche Huusmeier Karlmann greept de Sassen an, vun wegen dat se Hertog Odilo vun Bayern hülpen harrn
Sassenkriege
- 772 Kaiser Karl de Grote fangt sien Krieg mit de Sassen an, maakt de Eresborg (Obermarsberg bi Patterbuorn) platt un demoleer de Irminsul, wat en sassischet Hilligdom weer.
- 773 Karl mutt na Italien. De Sassen sünd nich fuul un hoolt sik de Eresborg trüch.
- 774/775 Karl maakt wedder en Kriegstog tegen de Sassen. Wedder hoolt he sik de Eresborg un dorto de Sigisborg. Bi Höxter geiht he över de Werser un treckt tegen de Ostfalen.
- 776 Karl wedder na Italien. De Sassen hoolt sik de Eresborg un de Sigisborg trüch.
- 777 In de Karlsborg in Patterbuorn höllt Karl sien Heerschau. Dor köömt ok Sassen un laat sik döpen.
- 779 Hartog Widukind fangt den Guerillakrieg tegen de Franken an. Karl mutt bit an de Ilv trecken.
- 782 Karl maakt sien Blootgericht in Veern an de Aller. He laat 4500 Sassen den Kopp afslaan.
- 783 Slacht bi Detmold un Slacht an de Hasel. De Sassen verleert un Widukind geiht in de Widukindsborg bi Rulle in’t Ossenbrügger Land.
- 784 Slacht in Dreingau
- 785 Karl fangt Widukind un Widukind laat sik döpen.
- 792-795 De Sassen stahn wedder tegen de Franken op.
- 796-799 Karl treckt wedder tegen de Sassen
- 804 De letzt Opstand vun de Sassen warrt vun Karl un sien Franken nedderslaan.
1106-1137 Hertog Lothar von Supplingborg
1142-1180 Hertog Hinnerk de Lööw
1076 Adam vun Bremen schrifft sien Gesta Hammaburgensis ecclesiae pontificum, wo he ok veel vun de Sassen vertellt.