ഏലേലക്കരടി
വിക്കിപീഡിയ, ഒരു സ്വതന്ത്ര വിജ്ഞാനകോശം.
പാലക്കാട് ജില്ലയിലെ അട്ടപ്പാടി(അഗളി) മേഖലയിലെ ഇരുളര് എന്ന ആദിവാസി വിഭാഗത്തിന്റെ നൃത്തമാണ് ഏലേലക്കരടി.കരടിയാട്ടം എന്നും ഇതിന് പേരുണ്ട്. സമൂഹത്തിലെ എല്ലാവരും ഇതില് സ്ത്രീ-പുരുഷഭേദമന്യേ പങ്കെടുക്കുന്നു.വീരരസം പ്രകടിപ്പിക്കുന്ന സംഘനൃത്തമാണിത്.ഇതിന് അഞ്ഞൂറിലേറെ വര്ഷത്തെ പഴക്കമുണ്ടെന്നു കരുതുന്നു.
മല്ലീശ്വരന് ക്ഷേത്രത്തില് ശിവരാത്രി ദിവസം ഈ നൃത്തം അവതരിപ്പിക്കറുണ്ട്.ദൈവപ്രീതിക്കും മരിച്ചവരുടെ ആത്മശാന്തിക്കും, വേണ്ടിയാണ് ഉത്സവകാലത്ത് കരടിയാട്ടം അവതരിപ്പിക്കുന്നത്. പത്തു പതിമൂന്നു പേര് ചേര്ന്നാണ് ഈ നൃത്തം അവതരിപ്പിക്കുക ‘ഏലേലെ ..കരടി ഏലേലെ..‘ എന്നിങ്ങനെ പാടിക്കൊണ്ട് വട്ടത്തില് സ്ത്രീപുരുഷന്മാര് ഇടകലര്ന്ന് നിന്ന് ചുവടുവെച്ച് കളിക്കും.വേഷവിധാനങ്ങള് ഒന്നുമില്ല. ആദിവാസി ചെണ്ട മാത്രമാണ് വാദ്യമായി ഉപയോഗിക്കുന്നത്.ചേറിയകുഴലും തകിലും ചിലപ്പോള് ഉപയോഗിക്കുന്നു.
നടുവില് തീകൂട്ടി അതിനു ചുറ്റുമാണ് പാടിക്കളിക്കുന്നത്.ചിലപ്പോള് പകലും കളി നടക്കാറുണ്ട്.കാവുന്റിക്കല് ബിണ്ണന് കേളു മൂപ്പന്, മുട്ടി മൂപ്പന് ,കടമ്പാറ ഊരിലെ നാട്ടുമൂപ്പന് എന്നിവര് ഏലേലക്കരടി നൃത്തത്തിലെ പഴയകാല ആശാന്മാരായിരുന്നു.
മനുഷ്യനും കാട്ടുകരടിയും തമ്മിലുള്ള ഏറ്റുമുട്ടലാണ് നൃത്തത്തിന്റെ പ്രമേയം. നിത്യജീവിതത്തില് ഇരുളര് നേരിടുന്ന കൊടിയ ദുരന്തമായിരിക്കണം കരടിയുടെ ശല്യം. സ്വന്തം ആവാസ കേന്ദ്രത്തിലേക്ക് കരടി വരുന്നതും അതിനെ ചെറുക്കുന്നതും, അതുമായി ഏറ്റുമുട്ടുന്നതും കൊല്ലുന്നതുമെല്ലാം വിവിധ ഘട്ടങ്ങളായി നൃത്തത്തില്കൂടെ അവതരിപ്പിക്കുന്നു. താളാത്മകമായ ചുവടുകള്ക്കു പുറമേ അലര്ച്ചകളും അട്ടഹാസങ്ങളും പോരിനു വിളികളും നൃത്തത്തിന്റെ ഭാഗമാണ്.
-
ഈ താള് പൂര്ണ്ണമല്ല, ഇതു പൂര്ണ്ണമാക്കുവാന് വിക്കിപീഡിയ സംരംഭത്തില് പങ്കാളിയാവുക (ശ്രദ്ധിക്കുക: നവാഗതര്ക്ക് സ്വാഗതം, സഹായക താളുകള്)
