വി. ബാലകൃഷ്ണന്‍
വിക്കിപീഡിയ, ഒരു സ്വതന്ത്ര വിജ്ഞാനകോശം.
വി. ബാലകൃഷ്ണന്‍
1932 ഫെബ്രുവരി 13ന്‌ പാലായില്‍ ഏര്‍ത്തുവീട്ടില്‍ ഡി. വേലായുധന്‍ പിളളയുടെയും പി. ഗൗരിയമ്മയുടെയും മകനായി ജനിച്ചു.
ആദ്യകാലത്ത്‌ സജീവ രാഷ്ട്രീയപ്രവത്തകനായിരുന്നു. സ്വാതന്ത്ര്യസമര പ്രസ്ഥാനവുമായി ബന്ധപ്പെട്ടു പ്രവര്‍ത്തിച്ചതിന്‌ കോളേജില്‍നിന്നും പുറത്താക്കപ്പെട്ടു.
1960 ല്‍ 'നീലക്കൊടുവേലി' എന്ന കഥ 'കേരള ധ്വനി'യുടെ ചെറുകഥാമത്സരത്തിലും 'ഇതു നമ്മുടെ നാടാണ്‌' എന്ന കൃതി സാഹിത്യപ്രവര്‍ത്തക സഹകരണ സംഘം നടത്തിയ ബാലസാഹിത്യകൃതികള്‍ക്കായുളള മത്സരത്തിലും ഒന്നാം സമ്മാനാര്‍ഹങ്ങളായതോടെ സാഹിത്യപ്രവര്‍ത്തനത്തിലേക്ക്‌ തിരിഞ്ഞു. 1962 ല്‍ 'ഒറ്റയാന്‍' എന്ന കഥ ദക്ഷിണഭാഷാ ബുക്ക്‌ ട്രസ്റ്റ്‌ നടത്തിയ മത്സരത്തില്‍ പ്രഥമസ്ഥാനം നേടുകയും എല്ലാ ദക്ഷിണഭാരതീയ ഭാഷകളിലേയ്ക്കും വിവര്‍ത്തനം ചെയ്യപ്പെടുകയും ചെയ്തു.
ഡോ. ആര്‍. ലീലാദേവിയെ വിവാഹം ചെയ്തതിനുശേഷം രണ്ടുപേരും കൂടിയായിരുന്നു സാഹിത്യസപര്യ. പിന്നീട്‌ മുഴുവന്‍ സമയ സാഹിത്യ പ്രവര്‍ത്തനത്തിനായി ഹൈസ്ക്കൂള്‍ അദ്ധ്യാപക ജോലി രാജിവച്ചു.
1967 ല്‍ മലയാളത്തിലെ ആദ്യത്തെ വിജ്ഞാനകോശത്തിന്റെ സമ്പാദനം നിര്‍വ്വഹിച്ചു. 1998 ല്‍ ഭാര്യ മരിക്കുന്നതുവരെ കൂട്ടായ സാഹിത്യരചന തുടര്‍ന്നു. അതിനുശേഷം 2004 ആഗസ്റ്റ്‌ 2 ന്‌ ദിവംഗതനാവുതുവരെ പൂര്‍വ്വാധികം അര്‍പ്പണബുദ്ധിയോടെ സാഹിത്യ ഉപാസന തുടര്‍ന്നു. ആദ്യകാലത്തെ അംഗീകാരങ്ങള്‍ക്ക്‌ ശേഷം മത്സരങ്ങള്‍ക്കോ പുരസ്കാരങ്ങള്‍ക്കോവേണ്ടി അപേക്ഷിക്കുകയുണ്ടായില്ല.
ഏറ്റവും പ്രിയങ്കരമായ മേഖലയായ ബാലസാഹിത്യത്തില്‍ തന്നെ 11,394 പേജുകളില്‍ (ഡെമ്മി 1/8 വലിപ്പം) നിറഞ്ഞുനില്‍ക്കുന്ന 67 ഗ്രന്ഥങ്ങള്‍ രചിച്ചിട്ടുണ്ട്‌. 1148 പേജുകളും (ഡെമ്മി 1/4 വലിപ്പം) 500 ചിത്രങ്ങളും ഉളള 'അമീര്‍ ഹംസ' എന്ന ഗ്രന്ഥം ബാലസാഹിത്യകൃതികളില്‍തന്നെ അത്യപൂര്‍വ്വമാണ്‌.
വേദങ്ങള്‍, പുരാണങ്ങള്‍, ആരണ്യകങ്ങള്‍, ഉപനിഷത്തുകള്‍, ബ്രാഹ്മണങ്ങള്‍, ദര്‍ശനങ്ങള്‍, മഹാഭാരതം, വാല്മീകിരാമായണം, ദേവീഭാഗവതം, തുടങ്ങി വേദസാഹിത്യത്തിലെ പ്രധാനപ്പെട്ട ഗ്രന്ഥങ്ങളെല്ലാം മലയാളത്തിലേയ്ക്ക്‌ മൊഴിമാറ്റിയിട്ടുണ്ട്‌.
ഇസ്ലാമിക വിജ്ഞാനകോശമുള്‍പ്പെടെ 16 ഇസ്ലാമികഗ്രന്ഥങ്ങളും ക്രിസ്തുമതവുമായി ബന്ധപ്പെട്ട പുസ്തങ്ങളും ഹൈന്ദവഗ്രന്ഥങ്ങളോടൊപ്പം രചിച്ചിട്ടുണ്ട്‌.
ഇംഗ്ലീഷില്‍ ഒരു നോവലുള്‍പ്പെടെ 11 പുസ്തകങ്ങളും
മലയാളത്തില്‍ 7 വിജ്ഞാനകോശങ്ങളും 21 നോവലുകളും 24 നിഘണ്ടുകളും ചെറുകഥ, യാത്രാവിവരണം, ഉപന്യാസം, ശാസ്ത്രം, പാചകം, ജീവചരിത്രം, പഠനങ്ങള്‍, അദ്ധ്യാപക സഹായികള്‍, തര്‍ജ്ജമ എന്നീ മേഖലകളിലുളള പുസ്തകങ്ങളുമുള്‍പ്പെടെ 290 ഗ്രന്ഥങ്ങള്‍ സ്വന്തമായുണ്ട്‌.
ഒരു ലക്ഷത്തി പതിനാലായിരത്തില്‍ പരം പേജുകള്‍ (ഡെമ്മി 1/8 വലിപ്പം) ഇതുവരെ പ്രസിദ്ധീകരിക്കപ്പെട്ടു.
