ശ്രീവിദ്യ
വിക്കിപീഡിയ, ഒരു സ്വതന്ത്ര വിജ്ഞാനകോശം.
മലയാളത്തിലെ പ്രശസ്തയായ ചലച്ചിത്രനടിയായിരുന്നു ശ്രീവിദ്യ.
മെലോഡ്രാമകളില്‍ മുഖരിതമായ മലയാള സിനിമയുടെ ചരിത്രത്തില്‍ ശ്രീവിദ്യ അഭിനയത്തികവുകൊണ്ടാണ് തന്റെ പേര് എഴുതിച്ചേര്‍ത്തത്. ‘റൌഡി രാജമ്മ‘, ‘ഇടവഴിയിലെ മിണ്ടാപ്പൂച്ച‘, ‘പഞ്ചവടിപ്പാലം‘ തുടങ്ങിയ ചിത്രങ്ങളിലൂടെ സിനിമയില്‍ പുതിയ ഒരു ഭാഷ രചിക്കുകയായിരുന്നു ശ്രീവിദ്യ.
[തിരുത്തുക] ബാല്യം
ആര്‍. കൃഷ്ണമൂര്‍ത്തിയുടെയും പ്രശസ്തഗായിക എം.എല്‍. വസന്തകുമാരിയുടെയും മകളായി തമിഴ്‌നാട്ടിലെ മദ്രാസിലാണ് ശ്രീവിദ്യ ജനിച്ചത്. ചെറുപ്പം മുതല്‍ക്കേ സംഗീതത്തിന്റെയും നൃത്തത്തിന്റെയും ലോകത്തായിരുന്നു ശ്രീവിദ്യ വളര്‍ന്നത്. 13-ആം വയസ്സില്‍ ‘തിരുവുള്‍ ചൊല്‍‌വര്‍’ എന്ന തമിഴ് സിനിമയിലെ ചെറിയ ഒരു റോളിലൂടെയാണ് ശ്രീവിദ്യ വെള്ളിത്തിരയിലെത്തുന്നത്. ‘അമ്പലപ്രാവ്‘ എന്ന ചിത്രത്തില്‍ ഒരു നൃത്തരംഗത്തില്‍ മാത്രം അഭിനയിച്ചിരുന്നു. മനോഹരമായ കണ്ണുകളുള്ള ഈ പെണ്‍കുട്ടി പെട്ടെന്നു ശ്രദ്ധിക്കപ്പെട്ടു.
1969-ല്‍ എന്‍. ശങ്കരന്‍ നായര്‍ സംവിധാനം ചെയ്ത ‘ചട്ടമ്പിക്കവല‘ എന്ന ചിത്രത്തില്‍ ആദ്യമായി സത്യന്റെ നായികയായി ശ്രീവിദ്യ മലയാള സിനിമയുടെ മുഖ്യധാരയിലെത്തി. കുസൃതിനിറഞ്ഞ നോട്ടവും നിഷ്കളങ്കമായ ചിരിയുമുള്ള ശ്രീവിദ്യ മലയാളിയുടെ മനസ്സില്‍ ഈ ഒരു ചിത്രത്തിലൂടെ നടന്നുകയറി. മലയാളത്തിലെ ആദ്യ പുരാണചിത്രമായ ‘അംബ അംബിക അംബാലിക‘യിലെ വേഷവും ശ്രദ്ധേയമായി. ‘സൊല്ലത്താന്‍ നിനക്കിറേന്‍‘, ‘അപൂര്‍വരാഗ ങ്ങള്‍‘ എന്നീ ചിത്രങ്ങളിലൂടെ തമിഴകത്തും അവര്‍ വ്യക്തിമുദ്ര പതിപ്പിച്ചു. ‘ചെണ്ട‘, ‘ഉത്സവം‘, ‘തീക്കനല്‍‘, ‘ഇടവഴിയിലെ മിണ്ടാപ്പൂച്ച‘, ‘വേനലില്‍ ഒരു മഴ‘, ‘ആദാമിന്റെ വാരിയെല്ല്‘, ‘എന്റെ സൂര്യപുത്രിക്ക്‘ എന്നിവ ശ്രദ്ധേയമായ ചിത്രങ്ങളില്‍ ചിലതാണ്. കന്നട, തമിഴ്, ഹിന്ദി, എന്നിവ ഉള്‍പ്പെടെ ആറോളം ഭാഷാചിത്രങ്ങളില്‍ ശ്രീവിദ്യ അഭിനയിച്ചിട്ടുണ്ട്. മലയാളത്തിന്റെ വെള്ളിത്തിരയിലേക്കു പ്രവേശിച്ചതിന്റെ പത്തൊന്‍പതാം വാര്‍ഷികം സംസ്ഥാന അവാര്‍ഡ് നേടിയാണ് ശ്രീവിദ്യ ആഘോഷിച്ചത്.
1979-ല്‍ ‘ഇടവഴിയിലെ മിണ്ടാപ്പൂച്ച‘, ‘ജീവിതം ഒരു ഗാനം‘ എന്നീ ചിത്രങ്ങള്‍ക്ക് മികച്ച നടിക്കുള്ള സംസ്ഥാന അവാര്‍ഡ് ലഭിച്ചു. 1983-ല്‍ ‘രചന‘, 1992-ല്‍ ‘ദൈവത്തിന്റെ വികൃതികള്‍‘ എന്നീ ചിത്രങ്ങള്‍ക്ക് വീണ്ടും സംസ്ഥാന സര്‍ക്കാരിന്റെ പുരസ്കാരം ലഭിച്ചു. ‘അയലത്തെ സുന്ദരി‘ എന്ന ചിത്രത്തിലൂടെ ചലച്ചിത്ര പിന്നണിഗായികയുമായി അവര്‍. ‘ഒരു പൈങ്കിളിക്കഥ‘യിലെ “ആനകൊടുത്താലും കിളിയേ“ എന്ന ശ്രീവിദ്യ പാടിയ ഗാനം അവിസ്മരണീയമാണ്.
‘നക്ഷത്രത്താരാട്ട്‘ എന്ന ചിത്രത്തില്‍ ശ്രീവിദ്യ പിന്നണിഗായികയായി. പിന്നീട് മിനി സ്ക്രീനിലേക്ക് ചേക്കേറിയ ശ്രീവിദ്യ സീരിയല്‍ രംഗത്തും സജീവമായിരുന്നു. 2004-ലെ ‘അവിചാരിതം‘ എന്ന പരമ്പരയിലെ അഭിനയത്തിന് മികച്ച നടിക്കുള്ള സംസ്ഥാന സര്‍ക്കാരിന്റെ ടി വി അവാര്‍ഡ് ശ്രീവിദ്യക്കു ലഭിച്ചു.
മധുവിനോടൊത്ത് ‘തീക്കനല്‍‘ എന്ന ചിത്രത്തില്‍ അഭിനയിക്കവേ ഇതിന്റെ നിര്‍മ്മാതാവായിരുന്ന ജോര്‍ജ്ജ് തോമസുമായി ശ്രീവിദ്യ പ്രണയത്തിലായി. 1979-ല്‍ ഇവര്‍ വിവാഹിതരായി. ഒട്ടേറെ വിവാദങ്ങളുണ്ടാക്കിയ കുടുംബജീവിതം 1999 ഏപ്രിലില്‍ വിവാഹമോചനത്തില്‍ അവസാനിച്ചു.
[തിരുത്തുക] മരണം
കാന്‍സര്‍ ബാധിച്ച് ശ്രീവിദ്യ 2006 ഒക്ടോബര്‍ 19-നു അന്തരിച്ചു. ‘അമ്മത്തമ്പുരാട്ടി‘ എന്ന സീരിയലില്‍ അഭിനയിക്കുകയായിരുന്നു ശ്രീവിദ്യ അവസാന കാലത്ത്.
