Bertolt Brecht
From Wikipedia
Bertolt Brecht (* 10. Februar 1898 in Augsburg; † 14. August 1956 in Berlin) weer en düütschen Dichter un Theaterfachmann.
Bert(olt) Brecht studeer toeerst Natuurwetenschappen un Medizin, wenn sik aver bold dat Theater to, weer Dramaturg in de Münchner Kamerspelen un wuur vun dar vun den groten Max Reinhardt (1873-1943) as Regisseur na Berlin haalt. Hier weer Brechts grote Tiet mit dat Heemkehrerdrama "Trummeln in de Nacht"(1922), wo de velen Bänkelsängergedichten in vörkaamt, mit de "Huuspostille" (1927) un vör allen mit de "Dreegroschenoper" (1928). He verstund dat, en Unnerwelt-Milieu as ene Aart soziale Anklaag dartostelln. Wat em darbi so goot gelung, weer de ne'e Dreih, eenfache Levensvörgänge uptogriepen, so dat se ehrlich bleven un doch as Kunst gellen kunnen.
För siene Warken kreeg Brecht vun all Sieten veel Loof, aver laterhen kemen doch Fragen up, wiel he sik ümmer mehr den Kommunismus towennen de. 1933 flücht he in't Utland un bleev ok in Moskau un laterhen in de USA flietig bi de Saak. As he 1947 na Europa trüchkeem, broch he ene ganze Reeg vun gode Dramen mit, t.B.:
- "Mudder Courage un ehre Kinner",
- "De gode Minsch vun Sezuan",
- "Galileo Galilei",
- "Herr Puntila un sien Knecht",
- "De kaukasische Kriedekring".
Brecht arbeid tolesd tosamen mit siene Fro, de Schauspelerin Helene Weigel, för de Oost-Berliner Bühne. Oost un West streden sik um em un kunnen em politisch nich recht inornen, aver sien Bedüden as Künstler un Theaterfachmann weer nich to bestrieden.
Vele vun Brechts Warken sünd in frömde Spraken översett wurrn. Hier kummt en lütt Översetten in Platt, dat toglieks ahnen lett, dat he in siene lesten Jahren en opsternaatschet Instellen to de DDR-Regeren harr .
De Utweg
- Na den Upstand an'n 17. Juni
- Leet de Sekretär vun den Schriftstellerverband
- In de Stalinallee Floogbläder verdelen
- Up de to lesen weer, dat dat Volk
- Dat Vertroon vun de Regeren verspeelt harr
- Un nu dör verduppelte Arbeit
- Trüchwinnen kunn. Weer dat denn
- Nich eenfacher, de Regeren
- Lööst dat Volk up un
- Wählt sik annerseen?
