Demost
From Wikipedia
Demost (hoochdüütsch: Delmenhorst) is ene kreisfre'e Stadt in den ehemaalschen Regeerbezirk Weser-Ems (Neddersassen), liggt an de Grenz van Bremen un hett 76.000 Inwahners. Demost is de gröttste Industriestadt twüschen Werser un Ems.
[Ännern] Geschichte
Demost liggt an'n Rand van de 20 bit 30 m hoge Geest in dat Siedland van de Delme. De Demoster Geest weer in vörgeschichtliche Tiet al tämlich dicht besiedelt. Dat betüügt de velen Funnen, de ut de Steentiet un de Bronzetiet stammt.
Vör 800 Jahren stund hier maal de Schlüterborg, de 1230 un 1234 van de Stedinger daalmaakt woor. De Ollnborger Grafen geven 1247 ehre Borg in Berne up un boen ene ne'e up den "Horst an de Delme". Darum nömen se sik "de Grafen von Ollnborg un Demost" De Graafschaft Demost weer tietwies sülvstännig un up dat Slott regeer dreemaal ene Sietenlien van dat Ollnborger Grafenhuus, tolest van 1577 - 1647.
1482 nehm de Bischop van Mönster de Stadt Demost in, aver Graaf Anton van Ollnborg kunn se 1547 wedder trüggwinnen. Na Graaf Anton Günther sienen Doot (1667) keem ok Demost bit 1773 unner däänsche Verwalten. In disse Tiet woor de Borg afbraken. Blots de "Blaue Toorn", de noch vandagen in dat Stadtwappen afbillt is, bleev bit 1787 bestahn. De Oort, de sik bi de Borg entwickelt harr, kreeg al 1371 dat Bremer Stadtrecht.
[Ännern] Weertschup
De lütte Ackerbörgerstadt harr in fröhere Tieden kiene Industrie. Blots van dat nege Dorp Hasbargen drung dat "Proppensnieden" na Demost vör. Dat heet: in Huusarbeit sneden vele Lüe ut Kork Proppens för Buddels in all Grötten, verdenen dar aver nich veel mit. As de Iesenbahnlien Bremen -Ollnborg boot weer, keem in korte Tiet en Industriebedriev na'n anneren. 1870 keem de Jutespinneree, 1882 de Linoleumfabrik un 1884 de Wullkämmeree. Vandagen existeert de groten Bedrieve nich mehr, aver darför hefft sik vele lüttere ansiedelt, t.B. Sanella, Delmod un Atlas. 1903 woor Demost ene Stadt I. Klass. Siet 1956 is Demost wedder Garnisonstadt. 1952 woor de Delmehall boot, dat is ene Hall, in de de Heerdbooksellschup ehre Rinnerauchschonen afholen kann, de aver ok för lütte Markten un Utstellungen un as Hall för Kundgeven un Fieren goot to bruken is.
