Jakob Erlandsen
From Wikipedia
Jakob Erlandsen († 18. Februar 1274 op Rügen) weer Arzbischop in Lund. Siene Öllern heten Erland un Caecilie.
As Doomproovst in Lund weer he as Advokat för Erik Plogpenning 1245 op’t eerste Konzil vun Lyon. Aver gegen den Wunsch vun’n König stimm he för Niels Stigsen as Bischop vun Roskilde, wat dorto föhr, dat sien Karkeninkamen un siene Arvgöder in Beslag nahmen worrn sünd. Later keem dat aver wedder to en Utgliek mit’n König. 1250 is he denn sülvst Bischop vun Roskilde worrn. Na Anwies vun’n Paapst kreeg he sien Goot trüch un dorto Kopenhagen. 1254 geev he Kopenhagen dat Stadtrecht. In’t sülvige Johr is he Arzbischop in Lund worrn. He bo Scholen in Roskilde und Lund. He keem mit König Christoffer in Striet, wiel he an dat afslute Primat vun’e Kark över dat weltliche Recht instah.
Op de Synood vun Vejle 1256 keem rut, dat dat Anwennen vun Gewalt gegen oder dat Fangennehmen vun enen Bischop to’n Interdikt föhren schall.
In’n Striet mit’n König sünd em all siene Privilegien afspraken worrn. He versegg sik, den Söhn vun König Erik as Thronfolger to krönen un verbünn sik mit de Feenden vun’n König, so dat he 1259 fangennahmen wörr. Na den Dood vun Christoffer is he vun de Königsweetfro Margret Sambiria freelaten worrn. He möök mit sienen Wedderstand gegen de Königsmacht wieder, weer aver de mehrste Tiet butenlands.
1272 leeg he sienen Fall bi’n Paapst in Rom vör, de em anwies en Vergliek to maken.
As he ut Rom trüchkeem, is he 1274 op Rügen dör en Piel ut ene Armbrust dood bleven. Dat hett en nee Ünnersöken vun’e Liek rutfunnen.
