Swedenspieker
From Wikipedia
De Swedenspieker is en Museum in de Stadt Stood. In de Swedentiet in Stood weer dat Huus en Havenspieker.
Inholtsverteken |
[Ännern] Historie
Mit den Westfäälschen Freden an’t Enn vun’n Dörtigjohrigen Krieg kemen de Hertogdömer Bremen un Veern an Sweden. Stood weer vun nu an de Verwaltenssitt vun dit Rebeet. 1692 hebbt se anfungen, enen Spieker an’n olen Haven to boen. Vun 1697 bet 1702 maken se ene Puus, bet de Spieker 1705 trech worrn is.
1909 hett de Stadt dat Bowark köfft un as Lager för de Schipperslüüd in’n Haven verhüert. Doch as dat na’n Tweten Weltkrieg bilütten mit de Schipperee ut weer, dor hett de Stadt 1974 beslaten, dat de Swedenspieker wedder in Stand sett warrn schull un dat en Museum dor rin schull. 3,6 Millionen Mark hebbt se utgeven un in’n Dezember 1977 geev dat de eerste Utstellung över de Wikingers. 1979 weer denn allens trech un kumplett utboot in’n Swedenspieker.
[Ännern] Bowark
Dat Bowark is 40 Meter lang, 16 Meter breed un üm un bi 20 Meter hooch. De een Meter dicken Wannen sünd ut Backsteen muert, dat Fundament is op Pähl grünnt. Dat hett twee Stockwarken in vulle Breed un dree mehr ünner’t Dack. De ünnerste Stock hett 400 Quadratmeter.
[Ännern] Utstellungen
Ganz ünnen sünd Utstellungen to sehn, de en poor Maal in’t Johr wesseln doot. In’n eersten Stock warrt de Stoder Stadthistorie anfungen bi de Wikingers bet in de Tiet vun de Industrialiserung wiest. In’n tweten Stock warrt 10.000 Johren Historie vun de Stoder Gegend wiest. In’n drüdden Stock denn liggt de Sammlung vun 9300 Zinnfiguren, de de Stoder Fritz Danner tohoopsammelt hett.
To sehn is ünner annern de Moorliek „Mann vun Oben-Olendörp“.
[Ännern] Weblenken
- Websteed vun dat Museum (hoochdüütsch)
Koordinaten: 9° 28′ N, 53° 36′ O
