Évèroui
From Wikipedia
|
Ch't' articl'ye fut c'menchie en Jèrriais
 |
Évèroui (ou York) est eune ville d'Angliétèrre. La ville a 'té eune cité d'pis les touos vièrs temps.
En 71, les Romains êtablyîtent un dgèrnison dans eune ville Celtique qu'il' app'lîtent Eboracum. Chu camp d'vînt la capitale d'la provînche du Nord d'la Brétangne Romaine. L'Empéreu Hadrien vîsitit la ville en 121; l'Empéreu Septimius Sévéthe y mouothit en 211; et l'Empéreu Constantius Chlorus y mouothit en 306. En 306 Constantîn l'Grand fut procliâmé empéreu du Vouêt à Évèroui.
Auprès la tchête d'l'empithe en Grande Brétangne, les Saxons lus êtablyîtent dans la ville qu'il' app'laient Eoforwic.
Des Vikings Dannouais gaffîtent la ville en 867 et l'app'lîtent Jorvik.
Les Nouormands bâtîtent deux châtchieaux. Wace app'lait la ville Everwic.
Coumme la capitale du Nord du Rouoyaume, la ville 'tait bein împortante. La prospéthité v'nait d'la lain'nie.
Les rouais d'Angliétèrre donnaient l'titre dé Duc dé York à lus s'gonds fis (Nouvieau York et York Street (La Plianque Bilo) à Saint Hélyi prannent lus noms en honneu du prînce, pas d'la ville)
L'Archêvêque dé York est l'deuxième êvêque dé l'hiérarchie d'l'Églyise d'Angliétèrre.
