Moulîn d'Tchétivé
From Wikipedia
|
Ch't' articl'ye est êcrite en Jèrriais
 |
Lé Moulîn d'Tchétivé (Le Moulin de Quétivel) est un moulîn à St. Pièrre dans la Vallée d'St. Pièrre au bas du Mont Fallu en Jèrri.
L'nom Tchetivé veint du nom Norrouais Ketill (ch'est li tch'avait donné san nom étout à Tchettehou (Quettehou) dans la Grand'-Tèrre) et l'mot Vièr Norrouais vellir (les clios).
Y’a ieu un moulîn sus ch't empliaichement d’pis 1309 au mains, quand i' fut r'gistré coumme la propriêté d'la Couronne.
Avaû les siècl'yes, lé moulîn a veu un tas d’aûnièrs et a 'té r'bâti tchiques fais. Lé bâtisse d’achteu fut bâti au dgiêx-huitchième siècl’ye quand y’avait l’pus grand nombre dé moulîns - y’en avait huit sus chu russé, et quarante-chîn moulîns en total en Jèrri. Nou-s’împortait l’fronment d’l’Ûrope dé l’Êst et pis nou l’renv’yait partout dans l’monde, sustout au Cannada et en Améthique.
Nou faîthait acouo sèrvi l’moulîn d’Tchétivé à la fîn du dgiêx-neuvième siècl’ye, mais au vîngtchième siècl’ye i’ tchiyit en d’lacres. Duthant l’Otchupâtion, nou l’èrfaîthait sèrvi, mais i’ fut r’freunmé auprès la Libéthâtion.
Achteu, lé moulîn est la propriêté d’la Compangnie dg’Ieau, et ch’est l’National Trust dé Jèrri tchi l’a bailli à tèrmage à seule fîn d’lé restaurer - v’là tchi fut fait en 1979.
L'moulîn est achteu un p'tit musée et les vîsiteurs peuvent acater d'la flieu du moulîn.
