Saint Aubèrt
From Wikipedia
|
Ch't' articl'ye fut c'menchie en Jèrriais
 |
Saint Aubèrt est un saint Nouormand tchi 'tait l'êvêque d'Avranches.
S’lon la légende, eune niet l’Archange Miché appathut à Aubèrt et lî dit d’fonder un monastéthe sus un rotchi dans la baie tch’avait nom Mont Tombe. Quand i’ s’rêvîlyit, Aubèrt criyait qué ché n’tait raiqu’un rêve, et i’ n’fit rein pouor fonder l’monastéthe.
Pis, Miché lî r’appathut et lî r’quémandit d’fonder chu monastéthe sus l’rotchi. Aubèrt pensit qu’chu rotchi-là n’tait pon vraînment la bouonne pliaiche pouor la bâtithie d’un monastéthe – i’ tait bein trop p’tit et bein difficile à vîsiter. Ch’est en tchi, au haut dg’ieau l’Mont Tombe ‘tait entouothé dg’ieau et la mé monte bein vite et y’a des mouoilliéthes dans les sablions à l’entou même au bas dg’ieau. Aubèrt don n’criyait pon qué ch’fûsse pôssibl’ye qu’Saint Miché voulait qu’i’ faiche autcheune chose dé même sus l’rotchi.
Mais l’saint Archange lî r’vîsitit eune traîsième fais. I’ tapit sus la tête à Aubèrt auve iun d’ses dés et însistit qu’l’êvêque prenge compte dé la c’mande dé bâti l’monastéthe s’lon la volonté du Bouan Dgieu. Lé dé brûlant d’l’ange avait tant d’forche qu’i’ pèrchit la tête à Aubèrt et lî laîssit un creux dans sa cranne. Aubèrt fondit l'monastéthe tch'est connu achteu coumme lé Mont Saint Miché.
