Trouaie

From Wikipedia

Ch't' articl'ye fut c'menchie en Jèrriais

Trouaie (en Grèc: Τροία, Troia, étout Ίλιον, Ilion) 'tait eune ville d'la P'tite Âsie bein connue dans la légende et dans les poésies épiques dé Homèr. La Dgèrre dé Trouaie et l'histouaithe du j'va dé Trouaie sont liées auve la ville.

La ville fut passecrite et sa situâtion fut oubliée pouor des siècl'yes. Y'en avait tchi criyait qu'la ville n'avait janmais existé et qué l'histouaithe 'tait raîque eune histouaithe à l'entou d'l'âtre racontée dans les touos vièrs temps.

Dans l's années 1870, un archéologiste Allemand tch'avait nom Heinrich Schliemann sé d'mentit d'la dêfouithie d'un mondrîn app'lée Hisarlık par les Turcots. I' trouvit l's êqu'sîns dé tchiques villes l'ieune sus l'aut' tch'avaient d's âges entré l'Âge dé Bronze et l'temps des Romains. I' dêcliathit qu'la ville Trouaie I, ou pus tard Trouaie II, 'tait la ville d'la Dgèrre dé Trouaie.

Des dêfouithies tchi siévîtent identifyîtent 9 villes:

• Trouaie I: 3000-2600 d'vant l'Christ
• Trouaie II: 2600-2250
• Trouaie III: 2250-2100
• Trouaie IV: 2100-1950
• Trouaie V: 20e – 18e siècl'yes d'vant l'Christ
• Trouaie VI: 17e – 15e siècl'yes d'vant l'Christ
  • Trouaie VIh: Âge dé Bronze tardive, 14e siècl'ye
• Trouaie VIIa: dans les 1300 – 1190, (ch'est à craithe la ville d'la Dgèrre dé Trouaie).
• Trouaie VIIb₁: 12e siècl'ye
• Trouaie VIIb₂: 11e siècl'ye
• Trouaie VIIb₃: jusqué dans les 950
• Trouaie VIII: dans les 700
• Trouaie IX: Ilium, ville Héllenistique, 1é siècl'ye d'vant l'Christ