Dafnís e Alcimadura
Un article de Wikipèdia, l'enciclopèdia liura.
Dafnís e Alcimadura, operà en occitan escrivut e compausat per Joan Josèp Cassanea de Mondonvila e interpretat peu purmèr còp davant la cort de Loís XV a Fontainebleau lo 24 d'octòbre de 1754.
Mondonvila qu'estampè Dafnís e Alcimadura dab la mencion: "Pastorale languedocienne". Que ho un projècte panoccitan au mens duas rasons: en purmèr, per'mor que lo prològ de l'autor que conda ua istòria de la lenga en explicant que lo latin que balhé ua lenga comuna (Mondonvila que l'apèra l'ancienne langue provençale) qui la lenga de Tolosa e la soa (de Narbona) que n' demòran pròches. La dusau rason qu'ei que los interprèts que vienevan de diferents parçans d'Occitània : Jeliòt de Bearn, Mla Fèl e La Tor de Gasconha e Trial de Provença.
Dafnís e Alcimadura que ho ua escaduda de las granas, interpretat durant mantuas annadas en un sarròt de vilas, de París a Montpelhièr en passant per Versalhas. Que ho tradusit, imitat, parodiat e criticat, çò qui balhé a l'occitan lo parat d'estar valorisat e laudat (per Grimm, per exemple e per lo Mercure de France ).
Se Dafnís e Alcimadura qu'ei de segur l'operà occitan lo me important deu sègle, ne ho pas lo sol ni tanpauc lo purmèr, e que cau açi mentáver qu'avan Mondonvila, un aute compositor occitan, Moret, que boté en musica lo libret de La Font de Las Festas de Talia (les feste de Thalie)dab ua entrada en provençau.
Sinopsis:
Acte purmèr: Dafnís qu'ei un riche pastor amorós d'Alcimadura, mes era, que s'arrefusa ad eth per'mor de non pas créder a la sincèritat. Janet, lo son hrair, que s'perpausa de provar a la soa sòr la sinceritat de Dafnís .
Acte dusau: Janet que s'deguisa en sordat e que se n' va trobar Dafnís qui'u conda qu'ei malurós per'mor deu son amor. Entà impressionar lo pastor, que s'vanta d'aver hèit mantuas guerras; que'u conda tanben que s'va maridar dab Alcimadura après aver aucít un pastor qui la corteja. Dafnís non s'muisha pas brica pauruc e que ditz que non cambiará pas d'amor. Alavètz, que s'entén Alcimadura a cridar per'mor qu'ei perseguida per un lop. Dafnís que la sauva en tuant la bèstia. Qu'ei reconeishenta, mes non pòt tostemps pas l'aimar.
Acte tresau:Janet qu'essaja de convéncer Alcimadura d'esposa Dafnís après qu'agi mushat la soa valor. Era que s'arrefusa totjorn per'mor que non vòu pas estar encadenada a l'amor. Per'mor deu son refús, Dafnís que la deisha en miaçant de s'tuar. Janet que vien condar la mort pastor. Còp sec, Alcimadura que desira la soa mort, muishant atau lo son amor per Dafnís. Urosament, la mort de Dafnís be n'èra qu'ua farça de Janet, e Alcimadura non pòt pas mei denegar ni arrefusar lo son amor.
