Joan de Cantalausa
Un article de Wikipèdia, l'enciclopèdia liura.
Joan de Cantalausa o Cantalausa (Bedarius 1925 - Cenhac 2006), de son vertadièr nom Loís Combas, es un autor occitan. Foguèt capelan e tanben professor d'universitat en França, Anglatèrra, e als Estats Units. Poliglòt, escrivan, traductor, grand defensor de la lenga occitana, atentiu a las publicacions per la joventut, una de sas òbras mai famosas es lo Diccionari General Occitan.
Cantalausa es l'autor d'una òbra granda que compren mai de trenta obratges en occitan. L'òbra sieuna mai coneguda es lo Diccionari General Occitan, publicat en 2002, diccionari que ten mai de 100 000 dintradas e 200 000 definicions e qu'es lo primièr diccionari occitan unilingue. Avodèt vint annadas de sa vida per tal de bastir aqueste diccionari. Foguèt tanben autor del Diccionari Occitan Illustrat de 15 000 mots acompanhats d'una definicion brèva e d'un imatge. Faguèt tanben la revirada en occitan dels quatre Evangèlis, del Libre de la jungla de Rudyard Kipling, La revòlta dels animals de George Orwell e de qualques aventuras d'Asterix.
Lo 13 de mai de 2003, lo Centre d'Agermanament Occitano-Català (CAOC) li faguèt un sopar d'omenatge a Barcelona.
Lo 22 de setembre de 2006 se moriguèt a Cenhac, a ras de Rodés, a 81 ans.
