Sikluban
From Wikipedia
King
astronomia, ing kabaldugan ning sikluban o universe, ing eganaganang atyu keta king banwa o kalawakan. Makayabe ya keti ing aldo, deng eganaganang planeta, kayabe ne ing Yatu, ing mabilug tamung galaxy, ampo reng dakal pang aliwang galaxy, at ing marayung kalawakan. Misna yang dagul iti - kapirasu ya mung dake na niti ing asisilip da reng scientist a maki radio telescope.
Asneng karagul iti a susukdan do reng dayu kareng light year - ing dayung darasa'na ning sala kilub ning pabanwa. Nung ing salukuyan a teknolohiya ing gamitan, pilang siglu ing milabas bayu miras king malapit diling batwin. Dakal lang e mu nanu deng batwin kesa king agyu tamung bilangan o akit man. King pilatan da reng batwin, keraklan alang bageng mayayakit at marimlang marimla.
Ing cosmology ing cienciang manigaral king penibatan ning eganagana. Miyayaliwa ing teorya da tungkul kaniti deng myayaliwang siglu. Ngeni, ing tatanggapan da reng keraklan, itang teoryang Big-Bang. Sasabyan na niting anyang umpisa, makatipun king metung a malating lugal ing laman ning sikluban, at kaybat, memakbung iti (Bang) kanitang minunang panaun.
