Brìscula
Di Wikipedia, l'enciclopedìa lìbbira.
La brìscula è un jocu di carti assai diffusu nta l'Italia. Si pò jucari 'n 2, 'n 4 (2 coppî di jucatura) o 'n 5 jucatura.
[cancia] Règuli
Si joca cu un mazzu di 40 carti divisi nta 4 semi (coppi, dinari, vastuna, spati) di 10 carti ciascunu. Nnô jocu a 4, li jucatura di ciascuna coppia s'assèttanu ntô tàulu unu di frunti a l'àutru.
Ogni carta avi lu so valuri, l'arsi vàlinu ùnnici punti, li tri deci, li re quattru, li scecchi tri e li fìmmini dui, tutti l'àutri carti nun vàlinu nenti e si chiàmanu lisci, la forza di na carta è 'n basi a lu sò valuri e chiddi ca nun vàlinu nenti sù urdinati 'n basi â grannizza.
A lu niziu dû jòcu si firria na carta, e lu semi di dda carta è la brìscula, appoi si dùnanu tri carti l'unu, l'àutri si pòsanu ntô tàulu e si ncumencia a jucari, ogni giru ognidunu dî jucatura tira na carta, e vinci, o la brìscula cchiù ganta, o, siddu nun ci sù brìsculi, la carta cchiù ganta dû stissu semi dâ prima ca fu trata, â fini dû giru chiddu ca pigghiau tutti li carti pigghia na carta di chiddi ca ci sù 'n capu lu tàulu e appressu a iddu tutti l'àutri jucatura a secùnnu di comu è lu giru, e appoi si riparti nzinu a quannu nun finìscinu li carti, â fini vinci lu jucaturi o la squatra ca fa armenu sissantunu, 'n capu a centuvinti.
[cancia] Pòpulu
Quannu si joca a cincu mmeci sta varianti si chiama pòpulu. Li règuli sù li stessi, ma nni stu casu li carti si dùnanu tutti sùbbitu, e prima di ncuminciari tutti li jucatura dichiàranu si chiàmanu o no, e si chiàmanu a quantu spèranu d'arrivari, chiddu ca dici cchiossai cumanna lu jocu e dicidi quali semi fa di brìscula.
Appoi si chiama na carta e lu jucaturi c'havi dda carta addiventa automaticamenti lu cumpagnu di chiddu ca chiamau, però lu cumpagnu nun si scopri e arresta ammucciatu nzinu a quannu nun nesci sta carta, l'àutri tri jucatura, fannu lu pòpulu, â fini dâ partita si cùntanu li punti, e s'iddu chiddu ca chiamau cchiù lu cumpagnu arrìvanu â cifra dichiarata a lu nizziu vinceru iddi, masinnò vincì lu pòpulu.
'N basi a cu vinci appoi s'assègnanu li punti, cchiù o menu 2 a chiddu ca chiamau, cchiù o menu unu a lu cumpagnu e cchiù o menu unu a li cumpunenti dû pòpulu.
