தகவற் பரிமாற்றத்திற்கான தமிழ் நியமக் குறியீட்டு முறை
கட்டற்ற கலைக்களஞ்சியமான விக்கிபீடியாவில் இருந்து.
தகவற் பரிமாற்றத்திற்கான தமிழ் நியமக் குறியீட்டு முறை என்பது கணினி சார் தேவைகளுக்கு தமிழ் எழுத்துக்களை பயன்படுத்துவதற்கென உருவாக்கப்பட்ட, எட்டு பிட் அடிப்படையில் அமைந்த ஆங்கிலம்-தமிழ் என இரு மொழிகளை கையாளத்தக்க ஒரு எழுத்து குறிமுறை நியமமாகும். இக்குறிமுறையின் பெயர் ஆங்கிலத்தில் சுருக்கமாக TSCII (Tamil Standard Code for Information Interchange) என்றவாறு குறிப்பிடப்படுகிறது. தமிழில் திஸ்கி எனவும் தகுதரம் (தமிழ் குறியீட்டு தராதரம்) எனவும் வழங்கப்படும் இதுவே முதன்முதல் தமிழில் உலகம் தழுவிய திறந்த இணைய உரையாடல் மூலம் தரப்படுத்தப்பட்டு உருவாக்கப்பட்ட குறிமுறை நியமமாகும்.
ASCII குறிமுறையில் அமைந்த ஆங்கில எழுத்துக்களின் மேலாக, எழுத்துரு ஒன்றினை பயன்படுத்தி தமிழ் எழுத்துக்களை கணினியில் பயன்படுத்திவந்த காலத்தில், தமிழ்- ஆங்கிலம் என இரு மொழிகளையும் பயன்படுத்தி ஆவணமொன்றினை தொகுப்பது மிக சிரமமான காரியமாக இருந்தது. தமிழ் எழுத்து குறிமுறை வரலாற்றில், இவ்வாறான சிக்கல்மிக்க ஒருமொழி ASCII குறிமுறையின் போதாமையை களைந்து உருவாகிய அடுத்தகட்ட படிமுறை வளர்ச்சியே திஸ்கி. ASCII குறிமுறை அட்டவணையில் ஆங்கில எழுத்துக்கள், அசசியமான குறியீடுகள் தவிர்ந்த ஏனைய இட ஒருக்கீடுகளில் தமிழ் எழுத்துக்களை பிரதியீடு செய்தலே திஸ்கி குறிமுறையின் அடிப்படையாகும். ஆரம்பத்தில் ஆங்கில எழுத்துக்களுக்கான ஒதுக்கீட்டிலேயே தமிழ் எழுத்துக்களை பிரதியீடு செய்த முறைமையிலும் பார்க்க இது முன்னேற்றகரமானதாகவும், இருமொழி கையாட்சிக்கு இலகுவானதாகவும் இருந்தது.
இந்த இட ஒதுக்கீட்டினை கீழ்க்காணும் படம் தெளிவாக விளக்குகிறது. 
பல்வேறு தொழிநுட்ப சிக்கல்களையும் களைந்து தற்போது இக்குறிமுறையின் நடப்பு வெளியீடான பதிப்பு 1.7 புழக்கத்திலிருக்கிறது. இக்குறிமுறையை பயன்படுத்தி தமிழை கணினியில் உள்ளிடுவதற்கு சிறப்பான உள்ளீட்டு முறைகளும் மென்பொருட்களும் தேவைப்படும்.
பின்வரும் உள்ளீட்டு மென்பொருட்கள் இதற்கு பிரபலமானவை:
GNU/Linux இயங்குதளத்துக்கானவை
- தமிழ் GTK IM
- SCIM
Windows இயங்குதளத்துக்கானவை
- முரசு அஞ்சல்
இக்குறிமுறைக்கான பல்வேறு வடிவங்களில் அமைந்த எழுத்துருக்களும் தற்போது இணையத்தில் தரவிறக்க கிடைக்கின்றன. இவ்வகை எழுத்துருக்கள் TSC_ என்ற முன்னொட்டுடன் ஆரம்பிக்கும்.
பன்மொழி குறிமுறையான யுனிகோட் குறிமுறையின் வருகைக்குபிறகு இருமொழி குறிமுறையான திஸ்கி யின் பயன்பாடு அருகி வருகிறது. யுனிகோட் குறிமுறையை கையாள முடியாத இயங்குதளங்கள், மென்பொருட்கள் போன்றவற்றில் தமிழை வினைத்திறனுடன் கையாள்வதற்கு இன்றும் திஸ்கியே உதவி செய்து வருகிறது. தற்போது யுனிகோட் குறிமுறைக்கும் சேர்த்து பயன்படுத்தக்கூடிய திஸ்கி எழுத்துருக்கள் கிடைப்பிலுள்ளன. இவ்வகை எழுத்துருக்கள் TSCu_ என்ற முன்னொட்டுடன் ஆரம்பிக்கும்.
