خواجہ محمد باقی اللہ
وکیپیڈیا سے
پیدائش: 1564ء
وفات: 1603
کابل میں پیدا ہوئے اسم گرامی رضی الدین تھا۔ ابتدائی تعلیم اپنے والد قاضی عبدالسلام ، جو خود بھی بڑے اچھے عالم دین تھے، سے حاصل کی۔ اس کے بعد ملا صادق حلوائی ، جو اپنے وقت کے بہت بڑے فاضل اور خوشگوار شاعر تھے کی خدمت میں حاضر ہوئے اور تحصیل علم میں مصروف ہوگئے ۔ ایک مجذوب کی نظر کرم سے کتابوں سے دل اچاٹ ہوگیا اور آپ کسی مرشد کامل کی تلاش میں نکل کھڑے ہوئے۔ آخر میں امیر عبداللہ بلخی کی خدمت میں پہنچے۔ اب طبیعت کو استقامت ہوئی اور مدارج روحانی میں ترقی ہونے کے بعد پیر بابا بھائی دلی کشمیری کے حضور پہنچے اور فیض حاصل کیا۔ اس کے بعد پیر کامل کی تلاش میں دہلی وارد ہوئے اور حضرت شیخ عبدالعزیز کی خانقاہ میں ان کے صاحبزادے شیخ قطب العالم کے پاس رہ کر یاد حق میں مشغول ہوگئے ۔ پھر اشارہ غیبی پاکر بخارا پہنچے اور خواجہ امکنگی کے حضور سے نقشبندی سلسلے کی تعلیم پائی ۔ انھی کے حکم سے واپس ہندوستا آئے اور چار سال بعد دہلی میں وفات پائی۔
حضرت مجدد الف ثانی آپ ہی کے مرید تھے۔ اکبر اعظم کے دربار سے وابستہ بہت سے امرا بھی آپ کے متعقد تھے۔ آپ نے امرا کے طبقے کی اصلاح کی طرف توجہ دی یہ آپ ہی کی کوششوں کا نتیجہ تھا کہ اکبر کے عہد میں جو لامذہبیت پیدا ہورہی تھی اس کا خاطر خواہ سدباب ہوااور طبقہ امرا میں مذہب سے وہ انس پیدا ہوگیا جس کے سامنے اکبر کے خیالات فروغ نہ پاسکے۔
