Hellas Verona
Da Wikipedia, ła ençiclopedia libara.
|
Sto articolo l'è scrito en diałeto veronexe
|
Sta vóxe non ła xe gnancora stà tradota tuta quanta da ła łengoa italiana. Se te si bon de farlo, te podaresi finirla ti. Grazsie.
Nota: se no ti vedi el testo da tradure xe parché el xe stà sconto. Maca su modifica par védarlo.
| Imagine:HellasVeronaFCstemma.svg | ||
| Mastini, Scaligeri | ||
| Segni distintivi | ||
|---|---|---|
| Colori sociałi: |   giallo-blu |
|
| Dati societari | ||
| Confederazione: | Template:UEFA | |
| Nazsion: |  Itałia |
|
| Federazsion: | FIGC |
|
| Çità: | Verona | |
| Fondazsion: | 1903 | |
| Presidente: | Piero Arvedi d'Emilei | |
| Palmares | ||
 |
||
Scudeti: |
1 |
- |
| Trofei nazsionałi: | ||
| Trofei Internazsionałi: | ||
| Stadio | ||
| Marcantonio Bentegodi 42.160 posti |
||
| Contàti | ||
| Hellas Verona Football Club S.p.A. Via Pancaldo, 68 |
||
| www.hellasverona.it | ||
L'Hellas Verona Football Club, l'è na squadra de balòn italiana, fondà nel 1903 col nome de Hellas in te ła çità de Verona. Nei ani pasadi l'è stà sempre ciamada solo Verona, parchè la jera l'unica squadra çitadina che la zughese in tei canpionati de Serie A o de Serie B. Al giòrno d'ancó, sicome che anca chel'altra squadra de Verona, el Ceo, la sà fato conósar in tuta Italia, de solito par distìnguarle se parla de Hellas e Ceo o Chievo.
L'Hellas el pol vantarse de esar stà, da quando ghè el canpionato con un giron solo, l'unica squadra de balòn (insième al Cagliari) a ver vinto un scudeto (ne ła stagion 1984-85) anca se l'è na squadra "provinciałe", fora dal giro de cuei che conta. Chei ani là del scudeto jè stà el periodo mejo de ła squadra, che l'è rivà par tri olte ała finałe de Cópa Italia. Ła squadra ła gà zugà 24 canpionati de serie A e 49 de serie B (rècor de prexenzse in te ła serie cadéta, insième col Bresia).
I cołori i rapresenta la çità, e in te ła divixa de ła squadra a ghè anca el stèma de Verona (na croce zala su fondo blu). Du soranòmi de ła squadra jè "i mastini" e "i scaligeri", che i se riferise a Mastin I de ła Scala de ła Signoria Deła Scala, che el gà tegnù la çità nel tredicesimo e nel quattordicesimo secolo. El stèma araldico dei Scaligeri el se cata suła maja con cui i zuga e in tel marchio socetario come un'imagine stilizsà de do mastini bei ciòsi che i varda in direzsion oposte.
Indice |
[modifica] Łe origini e i primi ani
Mesa sù nel 1903 da un pochi de studenti del liceo clàsico Scipione Maffei, ła squadra l'è stà ciamà Hellas, che l'è el nome con cui i Greci i ciama ła só patria, scoltando ła proposta del profesor Corubolo, che l'insegnava apunto el Greco. In chei ani là el balón el se zugava sul serio solo in te łe grande çità del Nord-Ovest del'Italia, e la major parte dei Veronexi ghe interesava gnente de sto spor. Però, quando che dó squadre de ła çità łe gà decixo de nar a zugar in Arena, la xente la gà scominsià a intersàrsene.
In sti primi ani l'Hellas l'era una de łe tri-quatro squadre che zugava a livel muniçipałe, batendose coi nemiçi de ła Bentegodi par decidar ci era el più forte in çità. In te ła stagion 1907-08 l'Hellas el sà méso a zugar contro squadre dela region, scominsiando na rivałità col Vicenzsa molto sentìa fin dèso.
Nel 1911 la squadra la gà scominsià a parteçipar al canpionato regionałe, che fin al 1926 l'era ła faxe de quałificazsion par el titoło nazsionałe.
Nel 1919, dopo la Prima guera mondiałe, la squadra la sà fuxo insieme coi rivali del Verona, canbiando el nome in Hellas Verona. Dal 1926 al 1929 nel Campionato Nazsionałe gh'era tute le mejo squadre dei vari grupi regionałi, e l'Hellas Verona el gh'era anca lu, anca se no'l faxéa grandi robe.
Al'inizsio de ła Serie A, in tel 1929 quando che el Canpionato Nazsionałe l'è deventà un canpionato de profesionisti, l'Hellas el sà fuxo con altre dó squadre veronesi, el Bentegodi e ła Scaligera, deventando A.C. Verona e zugando nel canpionato de Serie B. Ghe vorà comunque 28 ani parché el riva in Serie A. Dopo de ver zugà in A par la stagion 1957-58, nel 1959 la squadra la sà fuxo de nóvo con n'altra squadra veronexe (che se ciamava anca sta chì Hellas) e i sà méso el nome de Hellas Verona A.C., in omàgio ałe só origini.
[modifica] I Succesi degli anni 70 e 80
[modifica] El scudeto del 1984-1985
La strutura de ła squadra la jera bona che no se sa: i gavea vinto el canpionato de serie B, jera 'nda do olte de seguito in finale in Cópa Italia e i gavea pena fato do canpionati in serie A in dove che a un terzso del canpionato i jera primi in clasifica. El tènico el jera uno tipo svejo, brao che no se sa; i tifoxi i tegnea su ła squadra e i ła incitava senpre a far bèn. In più in tel'istà del 1984 è rivà anca do zugadori foresti bei ciosi, el nazsionałe todesco Hans Peter Briegel e el nazsionałe danese Preben Elkjear Larsen, che i gà dato subito ała squadra cheła parte de esperienzsa e de potenzsa che era mancà in tei ani prima.
La formazsion-tipo che gà vinto el canpionato la jera: Garella; Ferroni I, Marangon I; Briegel, Tricella, Fontolan I; Fanna, Volpati, Di Gennaro, Galderisi, Elkjaer; el mister l'era Osvaldo Bagnoli. Tra le riserve, ghe jera Luciano Bruni, Luigi Sacchetti e Fabio Turchetta.
Tra łe partìe da tegnerse in mente de chel'ano ghe n'è almanco dó: la prima l'è queła in caxa contro ła Juve el 14 de otobre 1984 (quinta giornada), vinta 2-0 con Elkjaer che gà fato un gol descalzso a Tacconi, parché el gavéa perso na scarpa durante el zugo; la seconda l'è queła al stadio "Friuli" de Udine (10 de febraro 1985, disdotéxima giornada), quando i veronexi i gà batùo l'Udinexe par 5-3 in te na partìa incredibiłe, metendo a taxer cuei che dixéa che i zugadori ormai no i gavéa più forzsa 'n te łe ganbe. Tra i altri epixodi de ła stagion: tri vitorie una dopo l'altra (conpresa na partìa mìa façile vinta contro la Roma 1-0), che le gà fato védar a tuti che la squadra l'era 'ncora svéia e in ganba anca se chełe altre squadre łe stava rimontando; e un pari 1-1 a Bergamo co' l'Atalanta, che gà fato vénzsar el titoło na giornada prima de ła fine.
Chel'ano lì el Verona el gà finìo con quìndexe vitorie, trédexe paregi, solo do sconfite e 43 ponti, 4 piesè del Torìn, col'Inter e la Sampdoria in terzsa e quarta poxizsion.
El scudeto del'Hellas Verona de Osvaldo Bagnoli, vinto propio quando tuti i piesè brai canpioni de bałon del'epoca (Platinì, Zico, Maradona, Socrates, Rummenigge ecc..) i zugava in Italia, l'è stà na roba che probabilmente no vegnarà mai più, forsi l'ultimo de un çerto modo de zugar a balon. L'è stà un scudeto stramerità e senzsa màcie, otegnù dopo ła longa cavalcada da sołi scominzsià in te ła prima giornada de canpionato, che l'ha podùo sucédar anca grazsie al fato che in chel'ano lì, par l'unica olta in tuta ła storia del calcio italian, łe dexignazsion dei arbitri jè stà fate col sistema del sortegio totałe.
[modifica] Ła squadra canpion d'Italia 1984-85
Hans Peter Briegel, Luciano Bruni, Antonio Di Gennaro, Dario Donà, Pietro Fanna, Mauro Ferroni, Silvano Fontolan, Giuseppe Galderisi, Claudio Garella, Preben Elkjær Larsen, Antonio Lonardo, Fabio Marangon, Luciano Marangon, Luigi Sacchetti, Sergio Spuri, Roberto Tricella, Franco Turchetta, Domenico Volpati, alenator Osvaldo Bagnoli.
[modifica] Anni recenti
[modifica] El derby col Ceo
In teła stagion 2001-02, quando che finalmente el Ceo l'è rivà in Serie A, Verona l'è deventà la quinta çità italiana a verghe un dèrbi de Serie A (el dèrbi de ła Scala), dopo de Milàn, Roma, Torìn e Genoa. El primo dèrbi, zugà al'undicesima giornada, quando che łe do squadre veronesi le jera in tei primi quatro posti de ła clasìfica, l'è stà vinto dal'Hellas par 3-2; el Ceo el gà vinto el ritorno con un 2-1.
[modifica] Bibliografia
- A Season with Verona: Travels Around Italy in Search of Illusion, National Character, and...Goals! de Tim Parks
[modifica] Ligadure forèste
- Sito Uficiałe
- HellasWeb.it - Sito dedicà al'Hellas Verona e ai só tifosi
- Hellastory.net, portale dedicà
- Veronacampione.it - Sito del scudeto 1984-1985
