Piazsa Bra
Da Wikipedia, ła ençiclopedia libara.
|
Sto articolo l'è scrito en diałeto veronexe
|
Piazza Brà l'è el nome de ła piazsa çentral e piesè granda de ła çità de Verona. Sui cuatro lati de ła piazsa se cata alcuni dei edifici e dei posti piesè inportanti de ła çità: el Listón, l'Arena, el palazso Barbieri indove ghe stà el sindaco e el palazso de ła Gran Guardia.
[modifica] Nome
El nome, de antica tradizsion, el ven da ła 'oze longobarda braida, che corisponde al tedesco Breit, "largo", e che vol dir "estension, anpiezsa, canpagna piana".
Sto significato chì l'è dimostrà da ła presenzsa de altri dó toponimi conpagni senpre a Verona: ła Bra dei Mołinari e San Giorgio in Braida. Quindi ła denominazsion ufiçiałe de "Piazza Brà" in realtà ła sarìa na tautołogia, cioè sarìa come dir "piazsa piazsa": difati, a Verona tuti quanti i dixe soło "la Bra", senzsa zontarghe altro.
La 'oze bràida, de uxo comun in tel diałeto veronexe de na òlta, intorno a l'ano Mile ła gà evidentemente perso la –j- e l'è pasà a brada, par dopo deventar braa (come gà scrito nel Trexento anca el Boccaccio) e quindi bra. La stesa –j- che casca ła se gà vùa 'ntel veronese bròl (che sarìa el "fruteto") dal tardo latìn broglium.
In tel periodo de ła Serenìsima Republica la Bra l'è stà anca dita Piaza d’arme, parché i soldà i ghe faxéa łe exercitazsion.
