S-cianco

Da Wikipedia, ła ençiclopedia libara.

Sto articolo l'è scrito en diałeto veronexe

El s-cianco a l'è un zugo de cuei de na olta. I ghe zuga i bocia de tanti posti in giro par l'Europa, e a seconda dei posti el gà tanti nomi diversi: in Italia in jenere se ghe ciama Lippa, ma ghè anca altri nomi seconda de ła rejion che te vè (nizza, maz, pindol etc.).

[modifica] Come che se zuga

Se dopara dó tochi de legno, uno piesè longo che l'è el bastón, e uno piesè curto che se ciama apunto el s-cianco, e ch'el gà da verghe do bełe ponte da tute dó le parte. Par zugar se mete el s-cianco in tèra, se ghe dà na beła tega col bastón su una de łe ponte in maniera che el se alzsa da tèra, e dopo bisòn brincàrlo al volo col bastón, e butarlo piasè distante che se połe. De sołito se se metéa a zugar in te na strada che ghe pasése poche màchine.

Come che se pol imaginar, l'èra un zugo ale òlte pitòsto pericołoso, parchè se te te ciapavi el s-cianco in testa te ris-ciavi de fàrte del mal. Però i butełeti i se godéa da mati a zugarghe, anca parché na olta no l'è che ghe fuse tanti altri zugatołi.

[modifica] El s-cianco al jiorno d'ancó

Ormai no ghè pì nisuni che zuga al s-cianco in giro par le strade, parché è canbià tante robe: no se połe più zugar par strada parchè pasa le màchine e le te stira se no te stè ténto, è rivà la banbàna e quindi i bocia i gà una saco de altre robe par pasàrse via, e insoma el s-cianco l'è stà quasi desmentegà. Comunque ogni tanto i organìzsa ancora qualche manifestazsion nełe piazse e i fa dei tornei de s-cianco che ghe va un bel po' de xente a védarli, parché questo e chialtri zughi de na olta jè 'ncora na roba che sùsita un certo interèse.

[modifica] Cołegamenti forèsti

Tocatì - Festival Internazsionał dei Zughi da Strada de Verona