Barco
From Wikipedia
| Dat artikel ier is nog moa e klêen begun. Ge zyt g'inviteerd vôor ip bewerk'n te klikk'n voe meer encyclopedische kennisse toe te voegn. |  |
Barco es end van de joaren 1923 begunnen deur voader Jules en zeune Lucien De Puydt in Poperynge. In 1933 richtten ze doar de "Belgian American Radio Corporation" (BARCO) op. Op 12 september 1934 werd de firma COBAR (Construction Belge d’Appareils de Radio) gesticht met als directeur Frank Bowens van de Artesian Avenue 1614 in Chicago. In November 1940 kwam Joseph Versavel an't ôofd en met Camiel Descamps werd in den duuk in en garage in Kortryk vôder geproduceerd.
n' Endeke achter den oorlog kwam de firma COBAR me het merk BARCO goe in gank me radio's en loater televiesies.
Anno 2006 werkt BARCO niemêe vô de consumentesector, moar zin ze wel ne sterke internationoalen niche speler in ofbeeldiengstechnology en -appareils en in textiel electronica.
Inoud |
[bewerk'n] En getuge vertelt ...
Ip Discuusje:Barco kundje d'originele getugenisse vinden van Pieter Bruynooghe.
[bewerk'n] 't Begun
Mie voader es oal ze leven ne vrêe goe kameroad gewest van Jozef Versavel (Jef) en ôok van Camille Descamps. Ewel, die twêe latste minsken èn Barco (Belgian-American Radio Corporation) ipgericht in de jaren 30 van de vôrige êeuwe.
't Begoste allemoale in 't klêene, moa da è gegroeid en gegroeid. Tot an 'n oorloge van '39-'45 bouwdigen ze radio's en pickups.
Binst den oorloge mochte da natuurlyk nie mêe, moa we tan ze dei'n binst den oorloge ek kik jammer genoeg nôoit geweetn.
[bewerk'n] Achter de twêeden oorlog
Moa achter den oorloge èn ze were vôorsgedoan mè radio's en pikups.
Tenden de joaren 40 èn ze begunn mè televisies te moaken. In 't begun woar'n da eigelyk radioappareils woa dat ter en T.V.-skerm in zat in de plekke van en postenbord. 't Skint da'j ton oal koste noa Rissel kiken (da noem nu TF1). Moa 't woaren nog nie veel liefebbers, want da woaren redelyk diere appareils e ge kostige toch moa juste Rissel pakk'n en doa was't natuurlyk oal in 't Frans.
Moa vôor da'k vôortvertelle moe'k zeggn da Camille Descamps nog joenk gestorv'n es, in 1947 peize kik. Ie wa nog moa juuste 40 joar of ezô entwadde.
Jef Versoavel eid allêene moetn vôortdoene, moa j'a wel vrêe goe personêel.
In 't joar van den Expo 1958 in Brussl kochtige mie voader zinn'n êeste Barco televisie. Ge koste eigelyk moa drie postn pakk'n: Brussl Vlams, Brussl Frans en Rissel 1.
Ge moe ôok weetn dan die toestellen nog me lampen werktigen en da teurde oalson bykans veuf menutn tegen da je beeld én klank oa.
[bewerk'n] Joaren 'tsjeventig en d'êeste petrolkrieze
Ja, de petrolkrieze..., Moa twa ôok de vulle ontwikklinge van de kleurenteevee. Iederêen wilde ton zuk nen appareil en wok de stereo-hifi-installoaties woaren ton in vullen ipgank. Barco begoste echt in grôote oeveeleed'n te produceer'n, want voe zoverre of dak'mie erinnere è Barco nog tegoare geweirkt mè Grundig, ge weet wel, da wa ton êen van de grôotste Europeeske radio en TV-fabrikkantn, oallesins de zwoare koenkurrèn van Philips. De Japaneez'n begosten ton ôk ip te koem'n, lyk Sony, Akai en noh e poar andre. Barco et toa toch wel probleem'n mee gèt.
Ip 'n bepoald momèn zoatn ze me ne veel te grôte stock an radios en televisies dan ze nie mè kwietgerochten. Z'an wok te veel personnêel en tèt toa begunn'n slig goan. Jef Versavel wa noch oalsan de grôotn boas en zien zeuns Bernard en Jo weirktegen wok in de fabrikke en oan e grôote responsabiliteit, anders gezeid: ne skôone post. Der woaren ton drie grôte fabrikken: êen in Kortryk, an de Theodoor Sevensloan, êen in Kuurne, in d'industriezone en êen in Poperinge.
[bewerk'n] Joaren 'tachentig: bykans om zêpe
Lik of da 'k oal 'n betje gezeid è, Barco zat tenden de joaren tsjeventig in de penoarie. Veel te vele teevees en hifi-installoaties in stock en te veel personêel. Skuld'n in overvloe en 't sag ter slig ut!
Moa ton moe ter ievers en vergoaringe hewest èn mè oender andere de toenmoalige Minister van Streekeconomie Mark Eyskens, die zoe gezeid èn "Barco moet gered worden!". In oalle gevoal: Barco a nog wel toekoemste, mêer bepôald in de beeldvorminge. Da was 't begun van de frabikoatie van beeldbandappareils en projecteer'n ip grôte skermen. En da dè nog oalsan de vôornoamste activiteit van Barco.
't Was ton da Jef Versavel en zinne zeune Jo de zoake verloatn èn. Alliène Bernard è noh gebleven moa j'è nu ôok oal ip pensioen.
Barco ed'ipgenoom'n gewest in en sorte van een consortium mè o.a. ACEC van Charleroi.
[bewerk'n] Joaren 'tnegentig: industrialisoatie en ip de buzze
Barco è nu - lyk dan ze zeggen - "ne weireldspeler" ip gebied van beeldvorminge. Projectieapparature van oalle moaten en sôrten. Ze stoan ôok oal en ende ip de buzze genoteerd, ip "Euronext" lyk of dat ta nu noem. In vroeger joaren wa dadde "Beurs van Brussel".
Oe dat 't nu juste zit mè Barco, weet ik nie me zo goe.
Med'andere woord'n: mien artikkel è verre van volledig en 'k kan mie vôorstell'n dan der ier en doa fouten in zittn woavôorn dak mie wille excuseren. Ja, ne miens kan nôois nie oalles weetn, niewoar? Ik zitte nog wel me ênigste vroagen:
- E Barco noh oalsan fabrikken in Kortryk, Kuurne en Poperynge ?
- Wien est ter nu de grôotn boas?
- Oeveel personièl én ze nu nog?
Ja, ge keunt ta misskien ipzoek'n ip uldere website, want dad'èn ze zeker, moa 'k zoe vroag'n an iederièn die mien artikel geleez'n è en zeker an de minsken die nog in Barco geweirkt èn en die der nu nog weirken oem eventuele verbeet'ringen an te bring'n.
Voilà, 'k peize da 'k voorlopig utverteld benne over êen van de peirels van de Kortrykske streke mè zukke rikke geskiedenisse. Oem 't eindigen winskik ulder nog veel leesgenot!
