Liverpool FC
From Wikipedia
Liverpool FC is nen Iengelse voetbolplog, upgericht up 15 moarte 1892 deur John Houding, n'eigenoare va Anfield, omda Everton verban gewist it deur een geschil over n'eur. De club speelt zin tuuswedstriedn in 't Anfield-stadion.
Liverpool wos seurtoe in de joarn tsjeventig en tachntig ne topclub. Zin tonne vele prizn gewon, zowel in d'Iengelse competische as in Europa.
In die periode va succes wos Liverpool jommer genoeg betrokk'n bie twêe va de grotste tragedies in 't Europese voetbol. 29 meie 1985 speelde Liverpool in de Europacup de fynale tegn Juventus in 't Heizelstadion i Brussel. Iere verloorn 39 meisn under leven. Bikkan vier joar loater, up 15 april 1989, up Hillsborough werd er gespeeld tegn Nottingham Forest in d'ouve fynale van de FA Cup. Ierbie verloorn zels 96 meisn under leven.
Twintig joar achter 't Heizeldrama speelt Liverpool in 't sezoen 2004/05 were e fynale va de Champions League. De club wordt ondertussn getreind deur de Spanjoard Rafael Benitez, die êerder ol twêe kirs landskampioen werd me Valencia CF. Nadat bie de rust tegenstander AC Milan up ne comfortabele ruststand va 3-0 vôorn stond, scoort Liverpool achter de rust bin 't kwartier ôok nog drie kêern. Vôormalig Feynoordspeler Jerzy Dudek is den held van den oavend ot ie vlak vôo 't verstriek'n van de extra tyd tot twi kirs toe Andriy Shevchenko va scoorn weerot en in de penalty-reekse ôok nog eki twi penalty's tegenot, woronder êen van dienezelfsn Andriy Shevchenko. Liverpool wint de pinaltyreeks me 3-2. Agezien Liverpool echter als vufde endigde in de competische wos et lang nie zeker dat de club zinne titel zo kun verdedign. Utindelyk besloot de UEFA da Liverpool de meugelykeid krigt vor under via de vôorrondes te platsn vo't hoofdtornooi.
