Poten kappen
From Wikipedia
Poten kappen (Nederlands: klauwverzorging, Iengels: hoof trimming) is 't doen van onderoed an de poten van surtoe melkkoein. Ook vette beestn, schap'n en gêetn worn under poten gekapt. Ook voe pern wordt da gedaan, mo ze spreken tonne van hoefverzorgienge.
Inoud |
[bewerk'n] Oogproductieve koeien
't Zien surtoe d'oogproductieve melkkoein die regelmoatig moeten gekapt worn. De Vlamse koeiboeren die e bitje voe de voruut zien doen 't ene keer per joar voor al under koeien, mo lyk d'Amerikaanders doen 't zelfs twee keers per joar voor al under koein. In Amerika doen ze 't meer omdat under voeiers meer eiwit bevatten. Da's surtoe deur da ze adaar meer luzerne geven. Meer eiwit in de voedinge resulteert in e rappere oorngroei, wodeure da ze zoen begun manken a je die klauwen nie onderoedt. In praktiek worn mo zuste d'achterpoten gekapt. An de voorpoten zien der in Vloandern nie veel gin problemen. Da komt omdat 't meeste gewicht van een melkkoe ip eur achterste poten komt, en oe oger de druk ip e klauwe, oe rapper dat em groeit, en dus in vele gevallen begunt scheef te groein.
[bewerk'n] Langleefbaarheid en koeiewelzien
Met andere woorn, poten kapp'n is een werksje die de langleefbaarheid en 't dierewelzien van je koein in oge moate verbetert.
[bewerk'n] Infecties van de klauwe
Met poten kapp'n kun der infecties van de hoorn genezen worn. De voornaamste bacteriële infecties zien stinkpoot en mortellaro. Die bacteriële infecties gaan de boern meestal ook proberen kwiet te geraken deur de koein regelmoatig een voetbad te geven. De koein kun a ze uut de melkstand der deure lopen. In da voetbad stoat er ongeveer 15 cm woater met daarin een aantal ontsmettende productn.
[bewerk'n] Bevangeneid
Nog een ander affairen da ze met poten kapp'n kun iplossen is de zogenaamde "zokke", bevangeneid, een klauwe die ontwikkelt lyk een slobberende zokke in te plekke van een schone normoale koeieklauwe. Da's een probleem da koein soms ne keer en achter 't kalvn.
[bewerk'n] Kriek'n
Een krieke kun je vergelyk'n met een blare ip je voetn. A je nieuwe schoen et kun je da wel ne keer en. Koeien kun bevoorbeeld een blare krygn deur ip een keitje te loop'n.
[bewerk'n] Oe wordt da gedoan?
De koein gaan in e travallie. Ze doen dadde e bitje lyk da'm wyder no den tantist gaan, met tegengoeste, mo ze zien wel content a ze 't get en. In de travallie zet je ze vaste da ze nie kun weg loop'n of stamp'n no de potekapper, en ook da ze zelve nie zoen kun omme vallen. A da gebeurd is, trek je met een katrolle enen achterpoot omoge toe ter ogte van je knien. In een eerste stap kuus je de te onderoen poot af. Da wordt meestal gedaan met schavelinge. Ton wordt de poot vlak gezet. Da wil zeggen da je zorgt lyk voor e schoë da de klauwe an eurnen onderkant helegans vlak is, dat de koe eurne poot nie meer scheef zoe staan. Ton wordt 't model gekapt. Da wil zeggen dat tussen de twee klauwn van de poot een model wordt gesneen zuste lyk de binnekant van je schoe. In een latste fase worn de foutjes weggewerkt. Met foutjes bedoeln we onder meer littekens van kriek'n en pleksjes van stinkvoet en andere concrete probleemtjes.
[bewerk'n] Wo kun je da leren?
Vele boern leren dadde in de landbouwschole. Ook de boereverenigiengn geven daar cursussen van.
[bewerk'n] Meer informatie
- GRONDMAN,W., et al., Beslissen van kalf tot koe, uutgegeven NRS BV, Arnhem, 2006. ISBN-10: 90-810966-3 - www.vrv.be/algemeen/publicaties
