Kadäm bevünetik Volapüka
From Wikipedia
Kadäm Bevünetik Volapüka, u balugiko Kadäm Volapüka (rigiko: Kadem Volapüka), päfünon ün gustul yela 1887, dü Volapükakongred telid tö München, zeilü dakip e menod Volapüka.
Zeil onik äbinon ad yufön Datuvale Volapüka, Johann Martin Schleyer, pö volfükam püka it. Äbinon komitanef dinitaleodik, kel binädon me cif: cifal it, el Schleyer), e dilekan: hiel Auguste Kerckhoffs, Volapükan gretik Fransänik. Jäfüdans 17 se läns 12 pävälons kademals (kadämals, o.b. kadämans löpik), e pälonon väl kademelas (kadämanas donik) e kademanas (kadämanas spodöl). El Schleyer äbaivögom ko el Kerckhoffs, das noganükam in München päsludöl pölelogon as büfik, e das laidüpükam (u votükam) binoda Kadäma pösludon dü kongred bevünetik ösököl (kel öjenon in Paris yelü 1889). Läo, el Kerckhoffs ägetom de Schleyer däli ad läükön kadämales 17 nog pösodis votik 7 fa ok pövälölis. Jäfidot Kadäma äbinon sirkülapenäd dilekana (Zulags), e läo i gased, keli äpübom el Kerckhoffs it: Le Volapük.
Ün 1889 äjenon in Paris Volapükakongred bevünetik kilid, dü kel pälonons statuds nulik pro Kadäm, ma kels zeils Kadäma äbinons lölöfükam, gudükumam e menodam gramata e vödastoka Volapüka. Ya bü 1889 ye äsplodon konflit vü els Schleyer e Kerckhoffs, ibä balidan äsuemom zeilis at as beg pro liegükam mögiküno mödik gramata e vödastoka, du telidan ädesinom ad revidön Volapüki lüodü balugükam e plagükam. El Kerckhoffs äplöpom ad moükön gitäti ela Schleyer ad refudön mobis nulik in Kadäm. El Schleyer neai äbaicedob ko miedükam at lautanagitätas okik, e, ven el Kerckhoffs ämobom Kadäme revid staböfik Volapüka, el Schleyer äsäcälom Kadämi lölik.
Ün 1890, el Schleyer ävälom Kadämi nulik Volapüka vü mens lölöfiko fiediks lü tikamagots okik. Kadäm at äblebon ye ti nedunöfik, e, ma nüns nemödik dö on in jäfidot veütikün Volapüka, Volapükabled lezenodik (Volapükagased zänodik), te älobülon sludis ela Schleyer. Kadäm nulik at änepubon nenseko ya ün 1893.
Dugamü hiel Waldemar Rosenberger, sis 1892, Kadäm pisäcälöl äprimon ad vobön pro el Idiom Neutral (Pük Neudik), ävotükon nemi okik ad Akademi Internasional de Lingu Universal (Kadäm Bevünetik Püka Valemik), e, cifamü hiel Guiseppe Peano, äprimon ad stütön eli Latino sine flexione (latin nen defomam) e dönu ävotükon nemi okik, ün naed at ad Academia pro Interningua (Kadäm pro el Interlingua).
