Cwåré madjike
Èn årtike di Wikipedia.
Li cwåré madjike est fwait di 5 mots di 5 letes, metowes e cwåré et ki s' plèt lére dins tos les sinses. Ele sont rprezintêyes dins ç' tåvlea ci et formèt les mots shuvants : SATOR - AREPO – TENET – OPERA – ROTAS (li semeu Arepo tént l’ cawe di l’ eraire).
On rlevrè :
- K' i n a todi ene cossoune après ene voyale, pu l' contråve.
- Ki ça s' pout lére di hintche a droete, e cminçant pa dzeu a hintche
- Ki ça s' pout lére di droete a hintche e cminçant pa dzo a droete.
- Ki ça s' pout lére e dschindant e cminçant a hintche.
- Ki ça s' pout lére e rmontant e cminçant a droete.
- Ki l' mot "TENET" est ene vraiye croes
- Dins les cwate cwéns, c' est totès cossounes.
Avou les 25 letes, on pout scrire 2 côps PATER NOSTER et i dmeure co α et ω, ki rprezintèt l' Crisse dins l' Apocalipe.
Li pus vî cwåré madjike a stî discovrou e l' Abissineye. On dit ki c' ere on sene di rconoxhance des prumîs Crustins.
Li cwåré madjike di Nayômé provént d' ene foirt viye tchapele do viyaedje, k' a stî disbrôlêye. Les djins do viyaedje ont stî ramasser les viyès pires del tchapele, sovint gravêyes, et s' è siervi po fé leus måjhons. On-z è voet co kékenes å mitan des meurs.
