Nicolas Bosret
Èn årtike di Wikipedia.
Nicolas Bosret a vnou å monde li 5 di måss e 1799, et morou li 18 di nôvimbe e 1876, c' esteut-st on scrijheu d' tchansons e walon d' Nameur, inte di zeles, «Li Bea Bouket».
Aveule tot djonne, il aprinda l' muzike, eyet, diviè 1820, dizo l' moennance olandesse, il askepia ene soce di «francs fårceus» k' aléve divni, oficirmint, e 1826, li «Ceke des Minteus», pu li «Cåbaret des Mintes» (1834) et co pus tård (1843) li soce Moncrabeau.
C' est Bosret ki va adjinçner, e 1857, l' orkesse Moncrabeaucyin, fwait di totes sôres di droles d' instrumints metans: li «tchén dal rimoye», les «cougnous a piston», li «tiesse di tchvå», li «malton». Et scrire des clapantès tchansons come «Li pikete do djoû å viyaedje», «Li sondje d' on blessî e Crimêye», «Ene fiesse namurwesse».
Li «bea bouket» fourit compôzé e 1851, et eplaidî dizo l' alomåcion «Li bouket del marieye».
