בני יואל
פֿון װיקיפּעדיע
|
אכטונג: יעדע ארטיקל פון וויקיפעדיע ווערט געשריבן נייטראל. |
בני יואל זענען סאטמארע חסידים, וואס וואוינען בעיקר אין קרית יואל און זענען קעגנערס פונעם לעצטן סאטמארע רבי דער ברך משה זצ"ל און זיין זוהן ר' אהרן טייטלבוים שליט"א.
זייער הויפט שיטה איז אז דער ברך משה מיט ר' אהרן האבן אפגענויגט פונעם ארגינעלן דרך פון ר' יואל טייטלבוים, דעריבער מוז מען זיך אפטיילן פון זיי, ווייל זייער הנהגה און סאטמאר איז א געפאר אז סאטמאר זאל אוועקפארן פון די עהרליכע וועג. בכלל איז זייער שיטה אז די היינטיגע רבי'ס זענען בלאפערס און זענען א סכנה פארן אידישקייט, און קיינער איז נישט ראוי צו ממלא מקום זיין ר' יואל זצוק"ל.
זיי רעדן טאג-און-נאכט פון צוויי ענינים, אדער פון די גדלות פון אלטן סאטמארער רבי'ן, ר' יואל טייטלבוים ווי זיי רופן איהם "דער רבי" אפי' נאכן הסתלקות פון ברך משה, אדער רעדן זיי טאג-און-נאכט פון די גנאי פון היינטיגן סאטמארע רבי ר' אהרן טייטלבוים, ווי זיי רופן איהם מיט שפאס און ביטול "אהרן".
דעם ברך משה רופן זיי "די סיגוטער", צוליב וואס האבן איהם קיינמאל נישט געטאן אנערקענען אלס סאטמארע רבי.
ט"ו בשבט תשמ"ט האבן זיי געעפנט אייגענע מוסדות אין קרית יואל מיטן נאמען "בני יואל" וואס האט ארויסגרופן א גרויס שטורעם און די וועלט, און א קייט פון נאכאנאנדיגע שלעגערייען און דראמאטישע קאנפליקטן, וואס איז באריכטעט געווארן איבער די וועלט.
זייער הויפט שלעגער איז יוסף וואלדמאן.
דער ברך משה האט געהייסן מ'זאל שרייען אויף זיי "שייגעץ ארויס".
דער מנחת יצחק זצוק"ל האט געשריבן א פסק הלכה אז זייער מוסד איז נגד התורה און אסור.
ר' אברהם לייטנער שליט"א האט געזאגט אז עס איז א מצוה צו שיקן אהין די קינדער ווי ער האט אנגערופן דעם ברך משה א "מנהיג יחידי".
די חסידים פון ברך משה טענה'ן אז בני יואל זענען אזוי ווי די נעאלאגן עזות פנים'ער און געלט-גייציגע מענטשן.
היינט צוטאגס האט די מוסד איבער טויזענט קינדער.
טראץ וואס די בני יואל האבן קיינמאל געקענט אנצייגן אויף עפעס ספעציפיש אין פראקטיק פארוואס ר' אהרן איז א ציוניסט און ווייניגער א סאטמארער ווי זיי, האבן זיי פארט געהאלטן אז פארן בלויזן פאקט אז ער איז אן איידעם ביים וויזניצער רבי, און זיין רביצין קען עברית, דאס אליין דיסקוואליפיצירט איהם פון זיין א מנהיג אין סאטמאר, און אזוילאנג ער גט זיך נישט פון זיין ווייב איז ער פסול פאר סאטמאר.
שפעטער ווען די סאטמארע מחלוקה האט אויסגעבראכן, האט זיך אן אינטערסאנטע זאך ארויסגעשטעלט, די מערהייט פון בני יואל האבן דערקלערט ר' זלמן לייב אלס זייער רבי און ממשיך דרך פון ר' יואל זצוק"ל, כאטשיג דאס איז קלאר קעגן זייערע פרינציפן אז די היינטיגע רבי'ס זענען בלאפערס און א סכנה פאר אידישקייט, און קיינער קען נישט ערזצען ר' יואל, אפגערעדט אזא איינער ווי ר' זלמן לייב וואס איז זיכער נישט הייליגער ווי זיין טאטע, אבער צוליב די טיפע שנאה און נקמה אין ר' אהרן'ען זענען זיי געלאפן צו ר' זלמן לייב איהם צו הייבן. אויך ר' אברהם לייטנער האט זיך אויסגעדרייט דעם דאשיק אין דערקלערט אז דער ברך משה האט געהאט א ספעציעלע "סייעתא דשמיא" מיטן אויפנעמען ר' זלמן לייב, אויך האט ער שטארק אראפ געריסן די אהרונים פארן גיין אין ערכאות, און די צייט וואס פאר די בני יואל בשעתו, האט ער געהאט מסביר געווען מיט לאנגע הסברים אז זיי האבן יא געמעגט גיין אין ערכאות קעגן ר' אהרן. די חסידים פון ברך משה, וואס זענען היינט די ארונים, צייגן דאס אן אלס זייער גרעסטע באווייז פון היפאקריטיזם מצד די בני יואל, אז זיי מיינען גארנישט קיין פרומקייטן נאר בלויז מאכט און געלט.
