Freienbach SZ

Us der alemannische Wikipedia, der freie Dialäkt-Enzyklopedy

Wappe

Basisdate
Kanton:	Schwyz
Bezirk:	Höfe
BFS-Nr.:	1'322
PLZ:	8807
Koordinate:	47° 12' n. Br. 8° 45' ö. L.
Höchi:	406-1'022 m ü. M.
Flächi:	20.31 km²
Iwohner:	14'623 (28. Februar 2006)
Websyte:	www.freienbach.ch
Charte

Technische Yschränkung:
Dr koräkt Titel wär: »Freyebach SZ«

Dialäkt: Züridütsch (See)

Freiebach (SZ) isch gröschti Gmeind im Kanton Schwyz wämmer uf d Iiwoner uege tuet. Sie bestaaht us de Ort Freiebach, Pfäffike, Hurde, Bäch und Wiile. Freiebach isch i de Aglomeration vo Züri und hauptsächlich uf d Stadt Züri uusgrichtet.

Nachbersgmeinde vo Freienbach sind Richterschwiil, Wollerau, Schindellegi, Feusisberg und Altedorf.

Freiebach isch Ändi 20. Jaarhundert fescht gwachse. Gründ defür sind:

d Hanglaag mit Sicht uf de oberi Zürisee und d Insle Ufnau und Lützelau, im Gränzgebiet vo de Kantön Schwyz, Züri und St. Galle, zmitzt in zahlryche Naherholigsgebiet,

d Verchehrslaag, per Autobahn A3 knapp 20 Minute vom Zürcher Stadtzäntrum und 40 Minute vom Flughafe Züri-Chloten eweg; de Baanhof vo Pfäffike isch en wichtige Isebaanchnotepunkt, Schnällzugshalt und Umschtiigistation für Büs und Poschtauto,

d Stüürpolitik mit psunders tüüfe Stüüre. Drum sind vil Chlii- und Mittelbetrieb (won Arbetsplätz gschaffe händ) und riich Lüüt det ane zoge,

wils als Vercheerschnotepunkt z Usserschwyz guet gläge isch, sind d Bruefs- und Kantonsschuel für March und Hööf und sogar e Fernuniversität z Freiebach pout worde.

I der Iiwohnerentwicklig gseht mer guet, dass Freiebach emal as chliises Puuredorf gsii isch und nachdem i de 60er Jahre d'Autobahn A3 bout worde isch, dänn isches au mit der Iiwohnerzahl zügig obsi gange.

[ändere] Statistik

Iiwohner Ändi 2005: 14'727 Persone

Konfession
- römisch-katholisch: 55%
- evangelisch-reformiert: 21%
- anderi: 24%

Erwerbsarte
- Landwirtschaft: ca. 2%
- Induschtrie und Gwerb:ca. 33%
- Dienschtleischtigsektor: ca. 65%

Gsamtflechi: 20.31 km²
- Kulturland: 35.9%
- Wald: 13.7%

d Flechi vo de äinzelne Ortstäil:
- Ortsteil Pfäffike: 11.5 km²
- Ortsteil Freiebach: 3.0 km²
- Ortsteil Wyle: 2.5 km²
- Ortsteil Bäch: 2.0 km²
- Ortsteil Hurde: 1.31 km²

Höchschte Punkt: Schönbode 1022 m ü.M.

Tüfschte Punkt: Zürisee 406 m ü.M.

[ändere] Iiwohnerentwicklig

Jahr	Einwohnerzahl
1850	2'058
1870	2'056
1880	2'045
1900	2'270
1910	2'359
1920	2'455
1930	3'231
1940	3'384
1950	3'950
1960	5'423
1970	8'487
1980	9'874
1985	10'682
1990	11'332
1995	12'161
2000	13'375
2005	14'727

[ändere] Gschicht

Erschtmaligi gschichtlichi Erwähnig: Insle Ufnau und Lützelau 741 inere Urkund vom Klosters St. Gallen. D'Dörfer Freiebach, Pfäffike und Bäch 965, bzw. 972 i de Schänkigsurkunde vo de Kaiser Otto I. und Otto II. as Kloster Einsiedeln.

[ändere] Steuerpolitik

De Kanton Schwyz und d Gmäind Freiebach im psundere sind bekannt defür, das si psunders wenig Stüüre iitriibe tüend. Drum züglet vill riich Lüüt det ane, wils eso vil Gäld chönd spare und trotzdem nöche vo de Stadt Züri sind won en grosses kulturells Aagebot und mäng Arbetsplätz häd. Das entspricht ere liberale Haltig; im Kanton Züri isch die Entwicklig aber mit Argusauge verfolgt worde. D Zürcher wärfed Freiebach vor, z schmarotze. Freiebach segi nume attraktiv, wil Züri e so nöch segi, wils aber ime andere Kanton liggi nöd über de Finanzuusgliich hälfi d Zäntrumslaschte mitzträäge.

Im Rahme vom baldige interkantonale Finanzuusgliich wird de Kanton Züri scho bald öppis vom Schtüürchueche us em Kanton Schwyz ab überchoo.

[ändere] Exekutive

Dr Gmeindrat behandlet di laufende Gschäft, underbreitet die Gschäft dr Gmeindsversammlig und füehrt d Beschlüss vo dr Gmeindsversammlig und vo de Urneentscheid uus. Dr Gmeindrat beschtaht us 9 Mitgliider. Jede Gmeindrat, jedi Gmeindrätin schtaht eim oder mehrere Verwaltungszwiig vor. S politische Amt füehred mit Uusnahm vom Gmeindspräsident sämtliche Ratsmitgliider im Nebeamt uus. Dr Gmeindspräsident isch sit em Urneentscheid vo 2004 im Halbamt aagschtellt.

Funktion	Person	Schtellvertretig
Präsidium	Kurt Zurbuchen (SP)	Finanze
Liegeschafte / Sicherheit	Werner Herrmann (FDP)	Präsidium
Finanze	Marco G. Walser (FDP)	Liegeschafte / Sicherheit
Tüüfbau	Andreas Beglinger (Unabhängigi Wähler)	Umwelt / öffentliche Verchehr
Bildig	Paul Feusi (CVP)	Ruumplanig
Sozials / Gsundheit	Franz Merlé (SVP)	Vormundschaft
Ruumplanig	Werner Schnellmann (FDP)	Bildig
Vormundschaft	Maria Züger (CVP)	Sozials / Gsundheit
Umwelt / öffentliche Verchehr	Gabriela Fuchs-Birchmeier (CVP)	Tüüfbau