Cheminucos
De Biquipedia
| Cheminucos | |
 |
|
| Nombre en latín | Gemini |
| Alcorzamiento | Gem |
| Simbolo |  |
| Chenitibo | Geminorum |
| Sinificato en aragonés | os cheminucos u meyos |
| Aszensión reuta | 7 h |
| Declinazión | 20° |
| Bistero ta latituz | entre -60° e +90° |
| Millor bisibilidá en | febrero |
| Aria total | 514 graus cuadratos |
| Lumero d'estrelas con magnitú aparén < 3 |
4 |
| Estrela más luminosa - Magnitú aparén |
Pólucs (β Gem) 1.1 |
| Plebia de meteoritos |
|
| Constelazions con que muga | |
Cheminucos u Gemini (os cheminucos u meyos) ye una de as constelazions de o zodiaco, situata entre a constelazión de Tauro á l'Ueste e a de Cánzer á l'Este. Á lo Norte, se troban as constelazions d'Auriga e a cuasi imbisible de o Lupo zerbal. A lo Sur, as de l'Unicornio e o Can menor.
Contenius |
[Editar] Carauteristicas
En ista constelazión, bi son dos estrelas luminosas: Cástor (α), una estrela binaria telescopica (sestuple en l'autualidá), e Pólucs, más luminosa e ubicata más á lo Surueste. As altras estrelas son más esmortexitas -nomás que una, Alhena (γ), puede alufrar-se bella bez dende as grans ziudaz-, e debuxan un reutanglo enta o Sureste.
Tamién en ista constelazión, en 1930, s'escubrió lo planeta Plutón, amán de a estrela Wasat (δ Geminorum).
[Editar] Ochetos
L'ocheto de o zielo prefundo más luminoso de Cheminucos ye M35, un carrazo estelar ubierto de 5ena magnitú, á 2800 años luz de a Tierra. Se troba á lo Nordueste d'η Geminorum, zerca de a marguin zurda de a constelazión.
[Editar] Mitolochía
Parando cuenta en as estrelas poco luminosas bisteras á simple güello, ista constelazión parex debuxar dos feguras alargatas paralelas. Ixo fazió que s'identificase con o mito de os clamatos Dioscuros, Cástor e Pólucs, os fillos cheminucos de Leda. O mito d'istos meyos ye muito relazionato con o furto de ganato, e podría estar ligato á bisions primitibas de a Carrera de San Chaime u Bía Lactia, en as que estarían situatos en metá de o ganato u d'una rabañera de bacas leiteras.
A orientazión de a constelazión puede bariar -ya que continan fendo lo debuxo de feguras alargatas igual si s'enclinan ta la dreita como ta la cucha-, anque s'acostumbra á beyer á os cheminucos decantatos enta man zurda. Manimenos, cuan s'enclinan ta man dreita, un de os cheminucos se troba en a Carrera de San Chaime e l'altro en ye difuera, o que fa que parexca que un de os meyos ye furtando lo ganato e que l'altro se lo mira. Ixo, chunto con a faxa de o zielo que ye desenta (an que agora se considera que i son as nuebas e muito esmortexitas constelazions de a Chirafa e o Lupo zerbal) e as altras carauteristicas de l'aria de Cheminucos (Orión, Auriga e Can Menor), podría aber estato l'orichen de o mito de os güeis de Cherión, un de os doze treballos d'Eracles.
[Editar] Astrolochía
En l'astrolochía ozidental, o sino de Cheminucos(21 de mayo-20 de chunio) ye asoziato con o elemento aire; ye, pues, un de os tres sinos d'aire, chunto con Libra e Acuario. En Cheminucos tien o suyo domizilio lo planeta Mercurio. Ye un de os cuatre sinos mutables, chunto con Birgo, Sachitario e Piszis. O suyo oposato ye Sachitario. D'entre as partis de o cuerpo, os Cheminucos gubiernan os brazos e as mans.
As cualidaz que os astrologos acostumbran á acumular-li son os d'un caráuter independién, adautable, peligarzero e elocuén, debez que dual, foricador, malestachero e nierbudo.
