Charlie Rivel
De Uiquipedia
Charlie Rivel yera'l nome artístísticu de José Andreu, payasu catalán ñacíu en Cubelles, provincia de Barcelona, el 24 d'abril de 1896 y muertu en Sant Pere de Ribes en 1983. Foi internacionalmente conocíu como payasu de circu. So pá y so ma, Pere Andreu Pausas (catalán) y Marie-Louise Lasarre (francesa) foron artistes de circu tamién.
Entamó la so carrera con namái que 3 años d'edá, actuando nel grupu Los Rivels colos sos hermanos Pablo y René. Actuó xunto a la so familia en diverses combinaciones hasta qu'en 1935, por desavenencies de tou tipo entama la so carrera en solitario, collechando ésitu a nivel mundial y obteniendo gran sonadía per toa Europa.
Garró'l so nome artísticu de Charlie Chaplin. La lleenda diz que Chaplin entrugó-y nuna ocasión: "¿Yes tu'l que m'imita o soi yo'l que t'imito a ti?". L'españíu de la Segunda Guerra Mundial marcaría la so personalidá definitiva (xerséi llargu, cadera y guitarra). Habría de permanecer na Alemaña nazi durante dos años, cumpliendo los sos contratos roblaos.
En 1954 tornó pa Barcelona, au convirtióse nuna estrella del Circu Price; yera mui orixinal el so númberu como "payasu aullaor".
En 1971 participa nuna película de Federico Fellini, Clowns.
En 1973, la televisión de Luxemburgu pide-y actuar nel entreactu, durante'l recuentu de vostos del Festival de la Canción d'Eurovisión.
Una de les anécdotes que se cuenten de Charlie ye la de cuando entró na pista del circu y tovía nun entamara la so actuación cuando un neñu entamó a llorar desesperadamente (probablemente yera la primera vez que vía a un payasu). Charlie nun podía entamar la so actuación yá que'l públicu taba más pendiente del neñu que del payasu. Charlie averóse-y pasu ente pasu pa face-y un afalagu y intentar calmalu, pero l'efectu foi'l contrariu y el neñu entamó a llorar con más fuerza tovía, ente les rises medio divertíes medio enternecíes del públicu adultu. Riverl fonderamente conocedor de la psicoloxía infantil, retiróse hacia'l centru de la pista y entamó tamién a llorar, desconsoladamente, solidariamente. Con eso bastó. El neñu calló calló nel actu, con unos güeyos sollertes pola sospresa de descubrir qu'aquel ser vestíu de collorao sabía espresase tamién col so mesmu llinguaxe: el llantu. Y Rivel continuó llorando. Y "Uuuuuuuh". Cuando tovía llorosu, volvió a averase al críu, ya calmáu dafechu y mirándolu colos güeyos arremeyaos, el neñu sacó'l chupu de la boca y dio-ylu a Charlie, nun actu de solidaridá . El llantu de Rivel agotóse y el públicu entamó a aplaudir.
