Xampiñón
De Uiquipedia
Col nome de xampiñón denomase xenéricamente a les especies de fongos del xéneru Agaricus, de les cuales delles cultivense como comestibles, n´especial Agaricus bisporus, el xampiñón de París.
Les especies d´Agaricus presenten de vezu fructificaciones carnoses, mayoritariamente de tamañu mediu a grande; el sombreru ye hemisféricu nún entamu, depués convexu y a la fin más o menos achapláu o lixeramente deprimíu, de color blanquecín o pardu. El pie ye cilíndricu y tanto regular como engrosáu o atenuáu haza la bas; siempres porta un aniellu, más o menos desenrolláu, que pue ser persistente o caducu y se separta con facilidá de la carne del sombreru.
Les llámines (himenóforu) son llibres, ye dicir nun fixaes al pie, denses, de color muy pálidu al aniciu (blanquecín, buxaracáu o rosáu) depués con matices rosaos, seyan fuertes o débiles, y a la fin de color marrón-negru. La carne suel ser densa y firme, de color blanquecín pero en contautu col aire alquier tonalidaes roxines o mariellaes, n´ocasiones lixeres y n´otras bastante intenses.
El golor varía d´unes especies a otres, incluyendo los selemente acidulaos, con efluvios anisaos, con reminiscencies d´almendres amargues o francamente desagradable (cual fenol) en delles especies cuya carne mariellea. La suma de golor desagradable y mariellamientu de la carne desaconseya´l so consumu.
