Itaka
Diwar Wikipedia, an holloueziadur digor
Itaka (e gregach Ἰθάκη, e gresianeg Ιθάκη), distaget /i"tak:\a/ [1], zo un enezenn eus ar Mor Ionian, er c'huzh-heol da Hellaz an douar-bras, hag er gevred da Gefalonia. Bez ez eo unan eus an Inizi Ionian ha tost da 5000 a dud zo o chom enni evit ur gorread a 96 km². Vathy eo he c'hêr-benn.
[kemmañ] Mojennoù
Hervez Odusseia Homeros e oa Ulises, roue Itaka, o klask distreiñ d'e rouantelezh pa oa echu brezel Troja, met chom a reas da gantren er Mor Kreizdouarel, pan edo e wreg Penelope ouzh e c'hortoz er gêr hag o klask dizarbenn he danvez-priedoù.
Al lec'h mojennel a oa Ulises e roue zo disheñvel eus an enezenn anvet Itaka hervez ar glaskerien a-vremañ [2].
[kemmañ] Istor
- War-dro 2000 bloaz a-raok JK ez eus bet kavet roud eus annezidi en enezenn. Tost da gêriadenn Pelikaté ez eus bet dizoloet un toullad mat a vezioù eus mare an Helladik krenn hag eus ar Mykenian , ha mogerioù kiklopeat. E lec'hioù all ez eus bet diguzhet podoù pri eus ar mare geometrek (trebezioù).
- 200 vloaz kent JK e oa an enez e dalc'h ar Romaned.
- Goude se e voe e-kerz Impalaeriezh Bizantion.
- En XIIvet kantved e oa perc'hennet gant Normaned Sikilia. Ur pennadig e voe e dalc'h an Impalaeriezh otoman, a-raok bezañ dindan aotouniezh Republik Venezia.
- E dibenn an XVIIIvet kantved e tegouezhas etre krabanoù republik nevez Bro-C'hall met e 1809 e voe distroadet ar C'hallaoued gant ar Saozon.
- E 1864 e voe "roet" Itaka gante da Vro-C'hres.
- E 1953 e voe distrujet an darn vrasañ eus batisoù an enez gant ur c'hren-douar.
[kemmañ] Pennadoù kar
- Douaroniezh: Mor Ionian, Inizi Ionian, Gres, Hellaz
- Mojennoù: Odusseia, Homeros, Ulises, Penelope
