Walter Ullmann
El Vikipedio
Walter ULLMANN estas germana esperantisto kaj samtempe aktivulo de la ksenofobia partio "Die Republikaner". Li naskiĝis en 1939 en Töppeles (nuntempe Teplička, Ĉeĥio) kaj estas emerita fervoja oficisto.
De 1989 ĝis 2000 li estis prezidanto de Esperanto-Societo Frankfurto. Poste li estis ĝia vicprezidanto, ĝis kiam en junio 2004 li demisiis. Li daŭre estas delegito de UEA en Friedberg kaj aktivas ankaŭ en la fervojista Esperanto-movado (IFEF).
Jam ĉirkaŭ la jaro 1990 esperantistoj el la regiono de Frankfurto vidis lian foton sur balotaj afiŝoj kaj lian nomon sur listoj de kandidatoj de la partio Die Republikaner. Okaze de la balotoj por la germana parlamento Bundestag en 1998, 2002 kaj 2005 lia nomo aperis en la rete publikigita listo de kandidatoj. Walter Ullmann tamen ĉiam strikte dividis sian agadon por Esperanto kaj por sia partio. La frankfurtaj esperantistoj (kies ĉefaj aktivuloj ĉiam sciis pri lia agado por politika partio, kies celoj parte kontraŭas tiujn de la esperanta movado) entute 6-foje elektis lin prezidanto.
