Gendulain (Zizur)
Wikipedia(e)tik
Gendulain Zizur Zendeako herri hustua da. Nafarroako gobernua, proiektu bat prestatzen dabil Gendulaingo kontzejua garatu eta udalerri bihurtzeko. Horretarako, Nasursak, etxebizitza erabilerako zoruen kudeatzaile publikoak (gaztelaniaz Navarra de Suelo Residencial, S.A.), lehiaketa bat antolatu zuen 2006. urtean Gendulain ezartzen den lurretan udalerri bat eraikitzeko. 2007ko urtarrilean "Diagonal" izeneko proiektua atera zen garaile, Sigifredo Martín Sánchez, Víctor Honorato Pérez eta José Mª Sánchez Madoz arkitektoek eginikoa.
[aldatu] Proiektua
Proiektua A-12 (Iruñea - Logroño) autobidearen bi aldeetan kokatzen da Zizur Nagusiaren hegoaldean. Guztira 18.970 etxebizitza eraikiko dira, 3.851.570,03 metro karratuko azaleran. Etxebizitza horietatik 14.227 babes ofizialekoak izango dira. Etxebizitza blokeak 5, 7, 9, eta 10 pisu izango dute eta gune berde ugari izango da eraikinen artean. Dentsitateari dagokionez, 50 etxebizitza izango dira hektarea bakoitzeko, dentsitate ertaina, eta Iruñerrian eraikitzen ari diren bestelako auzoetako dentsitatea baino handiagoa, baina Iruñea erdiguneko auzoena baino txikiagoa.
Etxebizitzez gain, Zizur Nagusia eta Gendulainen artean industrialde berri bat eraikiko da, Ardoi izenekoa. Gainera, proiektu irabazleak teknologi parke bat proposatzen du gune horretarako. A-12 autobidearen bi alboetan kokatuta egoteagatik, autobidea ekialderantz saihestu beharko da A-15 autobidearekin bat egiteko. Horrela, A-12 autobidearen ibilbide zaharra Gendulaingo etorbide eta erdigune bilakatuko da. Garraioari dagokionez, proiektu irabazleak tranbia linea bat proposatzen du, Gendulain Iruñearekin lotzeko. Dena den, oraindik aurkezteke dagoen Iruñeko tranbiaren bideragarritasun planak erabaki beharko du Gendulainen tranbia ezarri ala ez.
[aldatu] Kanpo loturak
| Zizur Zendea | ||
|---|---|---|
| Astrain | Eriete | Gazolatz | Gendulain | Larraia | Muru-Astrain | Paternain | Sagues | Undio | Zarikiegi | Zizur Txikia | ||
