Komando Autonomo Antikapitalistak
Wikipedia(e)tik
Komando Autonomo Antikapitalistak (ezagunagoak gaztelerazko izenaz eta akronimoekin: Comandos Autónomos Anticapitalistas, CAA edo CCAA) Euskal Herrian aritutako talde armatu iraultzaile bat izan zen.
Nazio arazoari dagokionez, independentziazaleak ziren, baina ez zuten KAS alternatiba onartzen, burgesiarekiko paktua onartzen zuelakoan. Kapitalismoarekiko haustura osoa aldarrikatzen zuten, langileen autonomia goraipatuz eta sindikatu nahiz alderdi politikoen kontra eginez.
Beraien jatorria 1970eko hamarkadan Hego Euskal Herrian indartsu zegoen langile mugimendu asanblearioan dago, baina KAAetako kideak jatorri oso desberdinetakoak ziren: Mugimendu horretan ibilitako marxistak eta anarkistak, ETAko berezietako batzuk, LAIA alderdiko eszisio batetik etorritakoak (LAIA ez bezala ezagutzen zirenak), etab.
Hainbat ekintza armatu burutu zituzten Hego Euskal Herrian, bonbaz nahiz armaz, hainbat pertsona hilez. Indar polizial eta parapolizialek ere KAAetako kideak hil zituzten, ezagunena Pasaiako enboskada bezala ezagututako gertaera delarik.
1980ko hamarkadan barrena ezker abertzalearekiko eta ETArekiko harremanak gaiztotu ziren, Herri Batasunak Komando Autonomoen ekintza bat gaitzetsi zuelarik (hauteskunde kanpainan, PSOEko buruzagi Enrique Casasen aurkakoa, Mendeku komandoak burutu zuena, hain zuzen). KAAetako presoek, era berean, ez zuten ETAko edo ezker abertzaleko presoekin kolektibo berean parte hartzen. Hainbat herritan, gainera, preso autonomoen laguntzarako talde propioak sortu ziren, Amnistiaren Aldeko Batzordeetatik bereizita.
Hamarkada horretan ere zatiketa eman zen KAAen barnean, nahiz eta talde bakoitzak sigla berberak erabiltzen jarraitu zuen. Funtsean, KAAen historiaren parte izan zen banaketa azaleratu zen: batzuek autonomia talde operatibo bakoitzaren ekintzarako askatasun bezala ikusten zuten bitartean, besteek langile klasearen ekiteko era autonomoa goresten zuten.
1990eko hamarkadan sartzearekin batera, ez zuten ekintza armatu gehiagorik burutu, nahiz eta hainbat kide preso edo erbestean izan.
