Micenas
Na Galipedia, a wikipedia en galego.
Micenas (IPA /my'ke:nai/, en grego moderno: Μυκήνες /mi'cines/) é un sitio arqueolóxico na Grecia, localizado perto de 90 km ao suroeste de Atenas, no nordeste do Peloponeso. No segundo milenio a.C, Micenas foi un dos maiores centros da civilización grega e unha potencia militar que dominou a maior parte do sur da Grecia. O período da Historia da Grecia de perto de 1600 a.C. a perto de 1100 a.C. chámase Micénico en recoñecemento á posición de lideranza de Micenas.
Crese que a acrópole ou "cidade alta" de Micenas foi fortificada no 1500 a.C. aproximadamente, debido á presenza de túmulos verticais que datan deste período. Aproximadamente en 1350 a.C. as fortificacións na acrópole e noutros outeiros circundantes foron reconstruídas nun estilo coñecido como "ciclópico", porque os bloques de pedra usados eran tan masivos que persoas en eras posteriores xulgaron que foron traballo de xigantes dun único ollo, coñecidos como cíclopes. Dentro destes muros, parte dos cales aínda poden ser vistos, foron erguidos palacios monumentais.
En períodos posteriores, os micenios pararon de enterrar os seus reis en túmulos verticais e pasaron a construír enormes sepulturas circulares chamadas tholoi, frecuentemente construídas nos lados dos outeiros. A maior delas foron descubertas polo arquéologo alemán Heinrich Schliemann. Unha vez que esas enormes sepulturas foron saqueadas moito tempo antes, el non notou que era un túmulo e deulle o nome de Sala do Tesouro de Atreus. Esta é tan grande que permitiu que Schliemann certa vez recibise o Emperador do Brasil, D. Pedro II, para almorzar no seu interior durante a súa visita ás escavacións arqueolóxicas.
A construción máis coñecida de Micenas é o Portal do León, que foi erguido aproximadamente en 1250 a.C.. Nesta época, Micenas probabelmente era unha cidade próspera, cun poder político, militar e económico que se estendía até Creta, Pilos, no Peloponeso occidental, e até Atenas e Tebas. Entrementres , perto do 1200 a.C., o poder de Micenas estaba declinando; durante o século XII a.C., o dominio micénico entrou en colapso. Tradicionalmente, isto é atribuído a unha invasión dos dorios, gregos do norte, aínda que actualmente algúns historiadores dubiden que tal invasión teña acontecido.
A lembranza do poder de Micenas mantívose nas mentes dos gregos durante os séculos seguintes, coñecidos como a Idade das Trebas. Os poemas épicos atribuídos polos gregos de xeracións posteriores a Homero, a Ilíada e a Odisea, preservan memorias do período micénico. Os poemas de Homero presentan a Agamenón, Rei de Micenas, como o líder dos gregos na Guerra de Troia.
Durante o período Clásico inicial, Micenas habitouse novamente, aínda que xamais recuperou a súa antiga importancia. Os micenios combateron en Termópilas e en Platea durante as Guerras Persas. Entrementres , en 468 a.C., tropas de Argos capturaron Micenas e expulsaron os habitantse. Durante os períodos Helenístico e Romano, as ruínas de Micenas eran unha atración turística, así como son hoxe. Unha pequena aldea surxiu para atender aos negocios xerados polos turistas. No entanto, o lugar abandonouse no final do Imperio Romano.
As primeiras escavacións en Micenas realizáronse polo arqueólogo grego Pittakis en 1841. El encontrou e restaurou o Portal do León. En 1874, Schliemann chegou ao lugar e realizou unha escavación completa. Schliemann consideraba como verdade histórica os poemas de Homero e interpretou as súas descubertas nesa liña. El encontrou os antigos túmulos verticais cos seus esqueletos reais e artefactos fúnebres espetaculares. Cando el encontrou unha máscara mortuaria de ouro nun dos túmulos, el exclamou: "Contemplen o rostro de Agamenón!"
Desde a época de Schliemann, realizáronse máis escavacións científicas en Micenas, principalmente por arqueólogos gregos mais tamén pola Escola Británica de Atenas. A acrópole escavouse en 1902, e os outeiros circundantes investigáronse metodicamente por escavacións posteriores.
Hoxe, Micenas, un dos lugares de fundación da civilización europea, é un destino turístico popular, e está a poucas horas de coche de Atenas. O lugar foi ben preservado, e as grandes ruínas dos muros ciclópicos e dos palacios na acrópole ainda causan a admiración dos visitantes, particularmente cando se lembra que tales muros foron erguidos mil anos antes dos monumentos da Grecia Clásica.
