Tommy Gemmell
Na Galipedia, a wikipedia en galego.
Thomas Gemmell, tamén alcumado coma Big Tam por se-lo xogador máis grande do Celtic da súa época cunha estatura de arredor do 1.90 metros, naceu en Glasgow, Escocia o 16 de outubro do 1943. Destacou por ser un daqueles lendarios Lisbon Lions que acadaron a única Copa de Europa aló polo 1967 pró conxunto católico. Cos verdibrancos xogou 418 partidos metendo 63 goles dos que 31 foron de penalti (era a súa especialidade).
Sempre cando xogou ó fútbol desenvolveu o rol de lateral esquerdo, demarcación na que defendeu a camisola do Coltness United, Celtic, Nottingham Forest e Dundee F.C. por esta orde. Este home logrou o gol que supuña a igualada momentánea nesa final do 1967 xogada no Estadio Nacional de Lisboa cun tanto de factura espectacular. E tamén foi quen de asina-lo tanto da final da Copa de Europa de 1970 na que o Celtic non puido co Feyenoord.
Tamén tivo a honra de poder representar á Selección escocesa de fútbol nun total de 18 ocasións, facendo un gol nun encontro no que Escocia vencera a Chipre por 8-0 no 1970. Tamén da súa estadía na selección nacional habería que salienta-lo feito de que era un dos xogadores que artellaba aquel plantel escocés que derrotou a Inglaterra no 1967 en Wembley por 2-3.
Coma adestrador foino do Dundee F.C. e mais do Albion Rovers.
