Jan Chojnan
Z Wikipedije, swobodneje encyklopedije
Jan Chojnan (němsce: Johannes Choinan(us)) (*1616, †1664) běše serbski rěčespytnik a teologa. Spisa najstaršu delnjoserbsku gramatiku a ma wulki podźěl při wudźěłanju delnjoserbskeje spisowneje rěče.
Chojnan bě w srjedźiznje 17. lětstotka ewangelski duchowny w Cerkwicach pola Lubnjowa.
Na zakładźe choćebuskeje narěče dopisa Chojnan w l. 1650 delnjoserbsku gramatiku, kotraž pak nječišćana zwosta. Chojnan běše při tym prěni, kiž srědki rěčneho přirunowanja naloži.
Na njeho dopomni wěnowanje z lěta 1650 pochadźaceje dupy we wjesnej cyrkwi w Cerkwicach. W tutej dźensa k Lubnjowej słušacej wsy je hasa po nim pomjenowana.
